Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր ևս հետաձգվել է դերասանուհի Անժելա Սարգսյանի անձնական կյանքին վերաբերող տեղեկությունները, այդ թվում` լուսանկարներ և տեսանյութեր, համացանցում տարածելու մեջ մեղադրվող Կարեն Արայանի դատավարությունը:
Կարեն Արայանի փաստաբան Արթուր Ղարիբյանը «Առաջին լրատվական»-ին հայտնեց, որ նիստը կրկին հետաձգվել է վկաների չներկայանալու պատճառով, որոնց դատարանն ի վերջո որոշում է կայացրել բերման ենթարկել: Իսկ վկաների թիվը այս պահի դրությամբ հասնում է 17-ի, որոնց թվում են, ի դեպ, «Արմենիա» հեռուստաընկերության եթերով հեռարձակված «Ուր է իմ տղամարդը» հեռուստասերիալի աշխատակիցներ ու դերասանական կազմի որոշ անդամներ:
Նշենք, որ դատավոր Մխիթար Պապոյանի որոշմամբ` այս գործով նիստերն անցկացվում են դռնփակ, քանի որ վերաբերում են մարդու անձնական կյանքին: Հերթական նիստը հետաձգվել էր վկաների՝ դատարան չներկայանալու պատճառով. վկաների թիվը հասնում է 17-ի: Դատարանում արդեն ցուցմունք է տվել ինչպես ամբաստանյալ Կարեն Արայանը, այնպես էլ Անժելա Սարգսյանը: Իսկ Արթուր Ղարիբյանի միջնորդությունը` Կարեն Արայանին գրավով ազատ արձակելու վերաբերյալ, դատարանը մերժել էր: Դատավորը սա պայմանավորել էր այն հանգամանքով, որ դատաքննության ընթացքում պետք է լսվեն կարևոր վկաներ, իսկ դրսում լինելով` Կարեն Արայանը կարող է ճնշում գործադրել նրանց վրա:
Հիշեցնենք, որ դերասանուհու նախկին ընկերը ձերբակալվել էր 2011 թվականի հոկտեմբերի 5-ին… Նրան մեղադրանք է առաջադրվել ՀՀ Քրեական օրենսգրքի 144 (Անձնական կամ ընտանեկան կյանքի մասին տեղեկություններ ապօրինի հավաքելը, պահելը, օգտագործելը կամ տարածելը) և 263 (պոռնոգրաֆիկ նյութեր կամ առարկաներ ապօրինի տարածելը) հոդվածների հատկանիշներով:
Հոկտեմբերի 7-ին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը նրա նկատմամբ խափանման միջոց էր ընտրել երկամսյա կալանքը, իսկ դեկտեմբերի 5-ին երկու ամսով երկարացվել էր կալանքի որոշումը: Դատական հաջորդ նիստը նշանակվել է մայիսի 4-ին:
