ԱԺ ՀՅԴ խմբակցության պատգամավոր Արծվիկ Մինասյանի գնահատմամբ, մեր երկրում սոցիալ-տնտեսական խնդիրները շատ են, իսկ որոշները դարձել են անլուծելի: Նա նշեց, որ սահմանադրությամբ գնաճի զսպման քաղաքականությունը դրված է Կենտրոնական բանկի վրա, սակայն Կենտրոնական բանկն ի վիճակի չէ իրականացնել այդ գործընթացը. «Թեև նշվում է, որ թույլատրելի գնաճը 4±1,5% պետք է լինի, բայց մենք ամեն տարի արձանագրում ենք կրկնակի գնաճ, դա էլ՝ պաշտոնական տվյալներով: 2010 թվականի 11 ամիսների ընթացքում ներքին գների աճը 10 տոկոս բարձր է եղել, ինչն անթույլատրելի է»: Արծվիկ Մինասյանը կարծիք հայտնեց, որ եթե ԿԲ-ն և կառավարությունն ընդհանրապես չգործեն, ապա գնաճի զսպման գործընթացն ավելի արդյունավետ տեղի կունենա. «Այսօր ԿԲ-ն ոչ մի պատասխանատվություն չի կրում, որևէ մեկի առաջ հաշվետու չէ իր վրա դրված պարտականությունները չկատարելու համար: Կառավարությունը, փոխանակ նորմալ աշխատի, գնաճի պատճառներն է բացատրում»: