Ռուսական ВЗГЛЯД թերթի փոխանցմամբ՝ այսօր Ցխինվալում տեղի կունենա Հարավային Օսիայի նորընտիր նախագահ Լեոնիդ Թիբիլովի երդման արարողությունը: Դրան մասնակցելու հրավեր է ուղարկվել ավելի քան 500 մարդու:
Թիբիլովի երդման արարողությանը ներկա է գտնվելու նաև ռուսական պատվիրակությունը, որը գլխավորելու է Պետդումայի նախագահ Սերգեյ Նարիշկինը: Թիբիլովի երդման արարողության հետ կապված՝ Հարավային Օսիայում իրականացվել են անվտանգության ուժեղ միջոցառումներ, մոբիլիզացվել են ՆԳՆ-ն ու ՊԱԿ-ը, փակվել է Վրաստանի սահմանը:
Թիբիլովի երդման արարողությանը մասնակցելու են նաև Հարավային Օսիայի նախկին նախագահներ Լյուդվիգ Չիբիրովը և Էդուարդ Կոկոյտին: Դրան մասնակցելու հրավեր է ուղարկվել նաև ընդդիմության առաջնորդ Ալլա Ջիոևային, որը նախորդ տարվա աշնանը հաղթանակ տարավ Հարավային Օսիայի նախագահական ընտրություններում, սակայն այն չեղյալ հայտարարվեց Հարավային Օսիայի Գերագույն դատարանի կողմից:
Հիշեցնենք, որ ապրիլի 8-ին Հարավային Օսիայում տեղի ունեցած կրկնակի նախագահական ընտրությունների երկրորդ փուլում Թիբիլովը հավաքել էր քվեների 54.12 տոկոսը:
