«ժողովուրդ»-ի տեղեկություններով՝ Աժ պատգամավոր Սամվել Ալեքսանյանը (Լֆիկ Աամո) փորձում է համալրել իր ընտրողների թիվը: Այս օրերին «Երևան սիթի» սուպերմարկետների ցանցի աշխատակիցներին ստիպում են զանգվածային դիմումներ ներկայացնել ոստիկանությանը՝ խնդրելով իրենց հաշվառել Մալաթիա-Սեբաստիա համայնքի թիվ 7 ընտրատարածքում:
«Հիմնականում նման դիմումներ կորզում են մարզերում գրանցում ունեցողներից: Նույն աղբյուրների փոխանցմամբ՝ նման քայլի է դիմում նաեւ Արաբկիրի թիվ 4 ընտրատարածքում առաջադրված ՀՀԿ-ական Արտակ Սարգսյանը՝ ՍԱՍ-ի Արտակը՝ իրեն պատկանող «ՍԱՍ» սուպերմարկետի աշխատակիցներին ժամանակավորապես դարձնելով արաբկիրցի»:
Լուրի կապակցությամբ մեկնաբանությունների համար «ժողովուրդ»-ը դիմել է Աժ պատգամավոր Սամվել Ալեքսանյանին, ով բնականաբար, հերքել է լուրը՝ ասելով, որ ինքը նման բաներով չի զբաղվում. «Ես իմ ընտրողներն ունեմ, ինձ ավել մարդ պետք չի: Փաստ ունե՞ք, մի հոգու անո՛ւն ասեք»:
«Սամվել Ալեքսանյանից հետաքրքրվեցինք նաև, թե ինչպես է մեկնաբանում ՀՀ նախկին վարչապետ Հրանտ Բագրատյանի մեղադրանքներն առ այն, որ միլիոնավոր դրամներ բյուջե չի մուտքագրում: Հարցին Սամվել Ալեքսանյանը հարցով պատասխանեց. «Ես ավելի շատ հետաքրքրված եմ` էն խոշոր տնտեսագետ Հրանտ Բագրատյանն իրա որձ կովերին գտավ, թե հլը ման ա գալիս»:
