Լոնդոն: «Սթեմֆորդ Բրիջ» մարզադաշտ: 37.700 հանդիսական: Մյունխենյան ալիքը հասավ Անգլիա: «Չելսի»-ն հաղթահարեց անհաղթահարելի թվացող արգելքը. Ռոբերտո դի Մատեոյի սաները պարտության մատնեցին «Բարսելոնա»-ին:
Հանդիպման սկզբից դաշտի տերերը նախաձեռնությունը զիջեցին հյուրերին, բացահայտ կերպով ցույց տալով, որ խաղալու են երկրորդ համարով և սպասելու են իրենց հնարավորությանը: «Արիստոկրատներ»-ի երկշերտ պաշտպանությունը պատնեշ դարձավ մրցաշարի գործող չեմպիոնի համար: Հենակետային գոտու ֆուտբոլիստների ճկուն խաղի արդյունքում փակվում էին դեպի Պետր Չեխի պաշտպանած դարպասը տանող բոլոր ճանապարհները, իսկ աչալուրջ հսկողությունը Լեո Մեսսիին հնարավորություն չէր տալիս ցուցադրել իր ողջ տաղանդը:
45-րդ րոպեին Անգլիայի ազգային հավաքականի կիսապաշտպան Ֆրենկ Լեմպարդը դաշտի կենտրոնական հատվածում գնդակը խլեց Մեսսիից, և անմիջապես հետևեց երկար փոխանցում ձախ եզր: Ռամիրեսը, ստանալով ազատ տարածություն, շարժվեց դեպի «Բարսելոնա»-ի տուգանային հրապարակ. բրազիլացու գեղեցիկ փոխանցմանը գեղեցիկ վերջակետ դրեց Դիդիե Դրոգբան:
Ամբողջ երկրորդ խաղակեսի ընթացքում կատալոնացիները փորձեցին ետ բերել կորցրածը, սակայն երբ հապաղում էին «Չելսի»-ի պաշտպանները, ֆանտաստիկ սեյվերի հեղինակ էր դառնում Չեխը: Խաղավերջում մի պահ «քարացավ» ամբողջ «Սթեմֆորդ Բրիջ»-ը, սակայն փոխարինման դուրս եկած Պեդրոյի հարվածից հետո «արիստոկրատներ»-ին օգնության հասավ ուղղահայաց դարպասաձողը:
«Չելսի»-ի անկոտրում կամքն ու հաղթելու անսպառ ցանկությունը տվեց համապատասխան արդյունք: «Բարսելոնա»-ն Լոնդոնը լքում է գլխիկոր:
Chelsea 1-0 Barcelona by goalsarena2012-3
