Երևանի Աջափնյակ և Դավթաշեն վարչական շրջանների ընդհանուր իրավասության դատարանում այսօր հետաձգվել է «Նորաշեն 2007»-ի գործով դատաքննությունը, որով, ինչպես «Առաջին լրատվական»-ն արդեն հայտնել է, «Նորաշեն 2007»-ից խաբված շուրջ 200 բնակարանատերերի գործերը քննվում են անջատ, քանի որ դատարանը որոշել է ընդհանուր քննությունից անջատել Լուսաբեկ Սամվելյանի և Արմեն Թադևոսյանի գործերը: Այս անգամ նիստը հետաձգվել է դատական նիստերի քարտուղարի բացակայության պատճառով և նշանակվել է ապրիլի 20-ին:
Ինչպես արդեն հայտնել էինք, այս գործով վերջին դատական նիստում ևս հերթական 10 վկաներն էին հարցաքննվել, որոնք ևս, ինչպես և նախորդ նիստերում հարցաքննված մի քանի վկաներ, վստահեցրել են դատարանին, որ դատարանում գտնվող երկու ամբաստանյալները` Արմեն Թադևոսյանը և Լուսաբեկ Սամվելյանը ստեղծված իրավիճակում ընդամենը զոհեր են, որոնց թիկունքում ավելի մեծ «շնաձկները» կկարողանան թաքնվել ու դատական այս պրոցեսի երկարաձգման արդյունքում կհասցնեն յուրացնել ավարը:
Նախորդ դատական նիստում ամբաստանյալները կրկին մի քանի բարձրաստիճան պաշտոնյաների անուններ են թվել, որոնց որպես իրենց հետ տեղի ունեցած թալանի հեղինակներ են ներկայացրել: Մասնավորապես ամբաստանյալները տվել են Հերմինե Նաղդալյանի, Արթուր Պողոսյանի և Արսեն Ավագյանի անունները, իսկ նիստի ավարտին լուրեր էին պտտվում, թե գործով հաջորդ, այսինքն` այսօրվա նիստում ամբաստանյալները անունների ցանկին ավելացնելու էին նաև Երևանի ոստիկանապետ Ներսիկ Նազարյանի անունը: Սակայն սա, փաստորեն, մնաց հաջորդ` ապրիլի 20-ի նիստին:
Հիշեցնենք, որ մինչդատական վարույթում ձեռք բերված ապացույցների հիման վրա կոոպերատիվի նախագահ Ա. Թադևոսյանին մեղադրանք է առաջադրվել այն բանի համար, որ հանդիսանալով «Նորաշեն 2007» սպառողական կոոպերատիվի նախագահ, գործընկերոջ Լուսաբեկ Սամվելյանի հետ ունեցած պայմանավորվածության համաձայն, նույն կոոպերատիվի կողմից կառուցվող բազմաբնակարան շենքում բնակարաններ վաճառելու պատրվակով 2007-2011թթ. ընթացքում բազմաթիվ քաղաքացիների վստահությունը չարաշահելով, նրանց հետ կնքել են բնակարանների նախնական առուվաճառքի և նախավճարի պայմանագրեր, գանձել են 1.843.379.449 դրամ առանձնապես խոշոր չափի գումար, այն հափշտակել, իսկ բնակարանները հետագայում իրացրել այլ անձանց, իսկ Ցոլակ Պետրոսյանը կազմակերպել ու ղեկավարել է Ա. Թադևոսյանի և Լ. Սամվելյանի կողմից խարդախությամբ մի շարք անձանց առանձնապես խոշոր չափի գույքի հափշտակությունը:
