Ադրբեջանական Trend լրատվական գործակալության փոխանցմամբ՝ Բաքու-Ղուբա ավտոմայրուղու 156 կիլոմետրանոց հատվածում՝ Ռուսաստանի սահմանին, փլուզվել է Գարաչայ գետի վրա ընկած կամուրջը: Այս մասին հայտարարել է Ղուբայի շրջանի ոստիկանության վարչությունը:
Վերջինիս հաղորդմամբ՝ դեպքը տեղի է ունեցել գիշերը՝ ժամը 3-4-ը: Փլուզվել է 90 մետր երկարություն և 8 մետր լայնություն ունեցող կամրջի մոտ 20 մետրանոց հատվածը: Կամրջի փլուզման պատճառով դադարեցվել է երթևեկությունը:
Փլուզման հետևանքով գետն է ընկել մի բեռնատար, որի վարորդ Ուլֆաթ Հուսեյնովը վիրավորվել է: Ոստիկանության հաղորդմամբ՝ կամուրջը գտնվում էր վթարային վիճակում և փլուզվել է ինտենսիվ անձրևների արդյունքում: Ճանապարհային մասնագետների կարծիքով էլ՝ փլուզումը տեղի է ունեցել տվյալ հատվածում գետաքարի արդյունահանման պատճառով: Տարվում է հետաքննություն:
