«Ժառանգություն»-ը գնում է ՕԵԿ-ի ճանապարհով. այսօր լրագրողների հետ հանդիպման ժամանակ նման տեսակետ հայտնեց թիվ 12 ընտրատարածքում առաջադրված պատգամավորության անկուսակցական թեկնածու Գոհար Վեզիրյանը:
Նրա կարծիքով՝ «Ժառանգություն»-ը ընդդիմադիր ուժ չէ:
«Ես, կներեք, այդ քաղաքական ուժը չեմ համարում ընդդիմություն: Ձայների փոշիացման խնդիր չկա ընդդիմադիր ուժերի թեկնածուների միջև: Ընդդիմադիր զանգվածը հաստատ Անահիտ Բախշյանի օգտին չի քվեարկելու:
Ասեմ, որ ես առավելություն ունեմ բոլոր իմ մրցակիցների նկատմամբ: Հենց հանդիպման եմ գնում բակեր և տներ, մարդիկ՝ իմանալով, որ անկուսակցական եմ, ասում են՝ արի, և լավ են ընդունում. այս առումով առավելություն ունեմ:
Ես ներկայանում եմ որպես մարդ, ով տասը տարի պայքարել է անօրինականությունների դեմ: Լավ Հայաստան ունենալու համար կարող եմ պայքարել ՀԱԿ-ի հետ»,- նշեց Գոհար Վեզիրյանը` հավելելով, որ իր թիմը շատ կազմակերպված է, սակայն իշխանությունը իր ուշադրությունը շեղելու համար իր նկատմամբ դիվերսիա է իրականացնում:
Ըստ նրա` բակային հանդիպումները բավական արդյունավետ են, դրանք տալիս են իրենց արդյունքը. մարդը հարցադրումներ է անում, և դու բավարարում ես նրա հետաքրքրությունը:
Արձագանքելով «Ժառանգությանը» վերաբերող Գոհար Վեզիրյանի հայտարարություններին` Անահիտ Բախշյանն ասաց, որ Վեզիրյանը պայքարել է Ստեփան Դեմիրճյանի, ՀԱԿ-ի հետ, ուստի ինչպե՞ս է անկուսակցական: Նա ընդգծեց, որ «Ժառանգությունն» անընդհատ խոսել է կոալիցիոն քաղաքական ուժի անօրինականությունների, բյուջեի թալանման մասին:
Անդրադառնալով Վեզիրյանի այն խոսքին, թե «Ժառանգություն»-ը գնում է ՕԵԿ-ի ճանապարհով` ասաց, որ Գոհար Վեզիրյանը ցանկանում է իրեն վիրավորել, բայց ինքը բոլորովին չի վիրավորվում` չնայած բավական ծանր մեղադրանքին:
«Այն հայտարարությունը, թե այսօր «Ժառանգություն»-ը գաղտնի հանդիպումներ է ունենում Հանրապետական կուսակցության հետ, դա Ձեր` լրագրողների վառ երևակայության արդյունքն է: Տարիներ շարունակ ՀԱԿ-ի կողմից ամենաանշնորհք եք ձևով թերթում գրել «Ժառանգության» հասցեին: Ես այդ ընտրատարածքում 8 տարի եղել եմ դպրոցի տնօրեն և այնտեղ շատ սերմեր եմ ցանել»,- մեկնաբանեց Անահիտ Բախշյանը:
