ԱԺ հասարակայնության և տեղեկատվության միջոցների հետ կապերի վարչությունը տեղեկացնում է, որ ապրիլի 17-ին Հայաստանի դեմոկրատական կուսակցության ղեկավար Արամ Սարգսյանի նախագահությամբ տեղի է ունեցել ԱԺ նախագահին կից մոնիթորինգային խմբի հերթական հանդիպումը:
Ընտրություններին մասնակցող քաղաքական ուժերի, հասարակական և միջազգային կազմակերպությունների ներկայացուցիչներից բացի, հանդիպմանը մասնակցել են նաև Կենտրոնական ընտրական հանձնաժողովի նախագահ Տիգրան Մուկուչյանը ու Հեռուստատեսության և ռադիոյի ազգային հանձնաժողովի հախագահ Գրիգոր Ամալյանը: ԱԺ նախագահ Սամվել Նիկոյանը տեղեկացրել է, որ դեռևս մարտի 7-ին հասարակական կազմակերպությունների կողմից իրեն է ուղղվել ՀԿ-ների քննարկումների արդյունքում ձևավորված հարցերի ու առաջարկների մի փաթեթ, որն առնչվում է Ընտրական օրենսգրքի մի շարք դրույթների ոչ միանշանակ մեկնաբանություններին, ընտրական գործընթացներում ԿԸՀ և ՀՌԱՀ լիազորություններին ու գործառույթներին:
Հերթով քննության են առնվել հասարակական կազմակերպությունների կողմից առաջադրված հարցադրումները, որոնց Տիգրան Մուկուչյանն ու Գրիգոր Ամալյանը տվել են սպառիչ պատասխաններ: Մասնավորապես հարցապնում էր արվել ընտրություններին զինվորների մասնակցության վերաբերյալ, այդ թվում` իբր վերջիններիս կողմից բաց կամ կրկնակի քվեարկությունների դեպքերի առնչությամբ: Տ. Մուկուչյանը փարատել է ներկաների մտավախությունը` նշելով, որ առնվազն վստահված անձանց և դիտորդների ներկայությունն ընտրատեղամասերում բացառում է նման դեպքերի հնարավորությունը: Բացի այդ, ընտրատեղամասերում հնարավորություն կա տեսա և լուսանկարահանում իրականացնել, իսկ քվեարկելուց հետո զիվորական գրքույկներում կատարվում է համապատասխան նշում : Ինչ վերաբերում է քվեաթեթիկների վրա տարբեր գույնի գրիչներուվ նշումներին, ԿԸՀ նախագահը տեղեկացրել է, որ բոլոր տեղամասերն ապահովվում են գրիչներով, օրվա ընթացքում դրանք ավելացվում են ըստ պահանջի, միաժամանակ` կարգը թույլ է տալիս ընտրողին իր գրիչով կատարել նշում:
Տիգրան Մուկուչյանը տեղեկացրել է, որ ներկա դրությամբ որպես տեղական դիտորդ արձանագրվել է 17000 մարդ, որը դեռ վերջնական թիվը չէ, ինչը հնարավորություն կտա ամբողջ ծավալով վերահսկողություն իրականացնել: Նշվել է, որ տպագրվել է աննախադեպ քանակությամբ ճանաչողական նյութ, ինչի շնորհիվ ընտրողը հնարավորություն կունենա տեղեկանալու իր իրավունքների մասին: ԿԸՀ-ում սահմանված կարգով արձագանքում են ստացված բոլոր դիմումներին, ինչպես նաև լրատվամիջոցներում տեղ գտած հրապարակումներին: ԿԸՀ նախագահը քաղաքական ուժերին, ՀԿ-ներին, ԶԼՄ-ներին հորդորել է իրենց հայտարարություններում, հրապարակումներում, հաղորդումներում լինել փաստարկված, հասցեական և զերծ մնալ չճշտված, խոսակցությունների ու բամբասանքների մակարդակով լուրերի տարածումից: Նրա խոսքով` եթե նպատակ կա կանխարգելելու խախտումները, ապա պետք է մատնանշվի կոնկրետ փաստը:
Տիգրան Մուկուչյանն անդրադարձել է նաև ընտրական հանձնաժողովների կազմման գործընթացին, վերապատրաստման դասընթացներին, ԿԸՀ գործունեության թափանցիկությանը: Այս իմաստով նա կարևորել է հանձնաժողովի նորացված կայքի շահագործումը, որն էապես դյուրացրել է ընտրական գործընթացներին հետևելը:
ՀՌԱՀ հախագահ Գրիգոր Ամալյանը ներկայացրել է հանձնաժողովի կողմից իրականացվող` հեռուստաընկերությունների հաղորդումների տասնօրյա մոնիթորիգի արդյունքները, այն մեթոդաբանությունը, որով առաջնորդվում են իրենց գործառույթներն իրականացնելիս:
«Մեր խնդիրն է ժամանակին կանխարգելել ընտրական գործընթացներում հնարավոր խախտումները, առավելագունս ապահովել Ընտրական օրեսգրքի ճշգրիտ կիրառությունը»,- նշել է ԱԺ նախագահը : Նա մասնավորապես մտահոգիչ է համարել այն լուրերը, ըստ որոնց` արդեն կողմերի միջև արձանագրվել են բախումներ: Այս խնդիրը ևս, ըստ Սամվել Նիկոյանի, առաջիկայում հարկ է ներառել մոնիթորինգային խմբի օրակարգում` հետագայում համանման դեպքերը բացառելու համար:
