Մարդիկ իրենց պատեպատ են տալիս մրցանակների համար. այսօր լրագրողների հետ հանդիպմանը նման տեսակետ հայտնեց Ազգային երաժշտական մրցանակաբաշխության ժամանակ տարվա լավագույն երգչուհի ճանաչված Սոնա Շահգելդյանը:
Նա նշեց, որ այս մրցանակին երկու տարի առաջ էր սպասում, բայց, չստանալով այն, չէր հուսահատվել: Երգչուհին դրական համարեց այն, որ իր աշխատանքը գնահատեցին:
«Իմ կյանքում մրցանակները նշանակություն չունեն, բայց կարևոր են: Ունեմ բազմաթիվ մրցանակներ: Ստացել եմ մրցանակ նաև «Արմենիա» մրցանակաբաշխության ժամանակ և արժանացել տարվա լավագույն երգչուհի կոչմանը: Երկու մրցանակներն էլ ինձ համար հաճելի են, բայց հայրենի հողի վրա ստացածն ավելի թանկ է: Այս տարվա մրցանակաբաշխությունը շատ արդար էր»,- նշեց երգչուհին` հավելելով, որ ինչ մրցանակ ստացել է, նախապես չի իմացել դրանց մասին, միշտ անակնկալ է եղել:
Նա նաև նշեց, որ նախորդ տարիներին չի պայքարել մրցանակ ստանալու համար, ես ուրախ դուրս եմ եկել դահլիճից: Սակայն երկու տարի առաջ մրցույթում հաղթելուց և երգիչ Մհերի հետ ունեցած համերգից հետո ունեցել է մեծ մենահամերգ, և, ըստ նրա, ցանկալի կլիներ, որ մրցանակ ստանար այդ ժամանակ:
Տարվա լավագույն երգչուհի ճանաչված Սոնա Շահգելդյանի համար երգչուհին երգչուհի է, երբ կարողանում է կենդանի ձայնով երգել:
Անդրադառնալով հետագա անելիքներին` նա տեղեկացրեց, որ այժմ առաջարկներ չունի, շարունակում է աշխատել և մատուցելու է բազմաթիվ անակնկալներ:
«Ես ունենալու եմ մենահամերգներ արտերկրում, հանդես կգամ նաև զուգերգերով: Դրանք կկատարվեն արտերկրի երգիչների հետ: Սիրում եմ այդ ամենի մասին խոսել իրագործվելուց հետո»,- նկատեց Սոնա Շահգելդյանը:
Հարցին՝ բացի Էրիկից, ո՞ւմ էր պատկերացնում որպես տարվա լավագույն երգիչ, Ս. Շահգելդյանը պատասխանեց՝ Էրիկին սիրում է, բայց կնշի նաև Մհերի անունը: Ըստ նրա` նա միշտ աշխատում է շատ լավ և ունի շատ լավ վոկալ:
«Նրան ևս տեսնում էի որպես տարվա լավագույն երգիչ: Էրիկի բախտը բերեց, որ իրեն ավելի շուտ տվեցին մրցանակը, ուրախ եմ, որ արդարություն կա: Լավագույն երգչուհիներ են ինձ համար էմմին, Աննա Խաչատրյանը, Լիանան: Ես ձգտում եմ մեծ բարձունքների ոչ միայն Հայաստանում, այլև արտերկրում: Ես արտասահմանյան երգիչներին շատ եմ գնահատում, բայց չեմ ցանկանում նրանց նմանվել»,- հավելեց Սոնա Շահգելդյանը:
