Ինչպես փոխանցում է The Daily Telegraph-ը, Միացյալ Նահանգները Խաղաղ օվկիանոսում` Գուամ կղզու վրա, ռազմակայան է կառուցում, որի ընդհանուր արժեքը կկազմի 15.2 մլրդ դոլար: Թերթի փոխանցմամբ, դրանով ԱՄՆ փորձում է դիմագրավել Չինաստանի ռազմական հզորության մեծացմանը: Ծրագրով նախատեսվում է կառամատույցի կառուցում ավիակրի համար, հակահրթիռային պաշտպանության տեղադրում, հրաձգարանի կառուցում եւ գոյություն ունեցող ավիաբազայի վերանորոգում: Երկրորդ աշխարհամարտից ի վեր սա առաջին խոշոր ռազմական ներդրումը կլինի խաղաղօվկիանոսյան ավազանում, եւ վերջին տասնամյակներին ամենախոշորը` ռազմածովային ենթակառուցվածքներում:
Գուամի բնակիչներին մտահոգում է այն, որ կղզու էկոհամակարգը դրանով կխաթարվի, եւ դա կազդի զբոսաշրջիկների ներհոսքի վրա, ինչն ապահովում է կղզու եկամուտների հիմնական մասը: Նաեւ ենթադրվում է, որ կղզու բնակչությունը կաճի, քանի որ շինարարությունից հետո այդտեղ կտեղակայվեն գրեթե 19.000 հետեւակայիններ, որոնք կտեղափոխվեն ճապոնական Օկինավա կղզուց:
Փորձագետների կարծիքով, այժմ Չինաստանը չի կարող ԱՄՆ-ի հետ ոտք մեկնել Խաղաղ եւ Հնդկական օվկիանոսներում, ուր ամերիկացիները գերիշխանություն ունեն: Սակայն վերջին տարիներին Չինաստանը մեծացնում է իր ռազմական հզորությունները: Բացի այդ, Չինաստանը ցանկանում է գրավել Մերձավոր Արեւելքից եկող ուղիները, քանի որ մինչեւ 2035թ. վառելանյութի եւ այլ էներգակիրների 70-80%-ը ստանալու է Մերձավոր Արեւելքից: