«Հիմքեր կան ենթադրելու, որ Մոսկվան չի հրաժարվի ղարաբաղյան հակամարտության կարգավորման բանակցությունների մոդերատորի իր ջանքերից, և հունվարի 24-ին շատ բան կպարզվի», Trend-ին տված հարցազրույցում հայտարարել է Մոսկվայի պետական համալսարանի պատմության ֆակուլտետի դեկանի տեղակալ Ալեքսեյ Վլասովը:
Հունվարի 24-ին Մոսկվայում ՌԴ արտգործնախարար Սերգեյ Լավրովի նախաձեռնությամբ կայանալու է Հայաստանի և Ադրբեջանի արտգործնախարարների հանդիպումը: Փորձագետի կարծիքով, ԵԱՀԿ գագաթնաժողովից հետո կարգավորման գործընթացում դադար է առաջացել, որի ընթացքում պետք է հստակեցվի միջնորդների հետագա գործունեության ֆորմատը: Նա շեշտել է, որ Ռուսաստանը, հնարավոր է, ղարաբաղյան հակամարտության կարգավորման հարցը ներառի Կովկասում առկա այլ հակամարտությունների կարգավորման համատեքստի մեջ: Այդ քայլի հնարավոր պատճառներից մեկն էլ այն է, որ Մոսկվան ցանկանում է վերահսկել միջազգային կազմակերպությունների գործունեությունը տարածաշրջանում և մտադիր չէ բանակցային գործընթացում նվազեցնել անցած տարի ունեցած տեմպը: Միևնույն ժամանակ Վլասովը քիչ հավանական է համարում հունվարի 24-ի հանդիպման արդյունքում արմատական փոփոխությունների հավանականությունը, սակայն հանդիպումը որոշակիորեն կհագեցնի ԵԱՀԿ Աստանայի գագաթնաժողովից հետո առաջացած դադարը: