Այսօր` ապրիլի 14-ին Հայաստանի կենտրոնական ընտրական հանձնաժողովը գումարել էր արտահերթ նիստ:
Նիստի ընթացքում հանձնաժողովն ընդունել է որոշում` 2012թ. մայիսի 6-ի Ազգային ժողովի հերթական ընտրություններին դիտորդական առաքելություն իրականացնելու նպատակով հրավիրել Ընտրական համակարգերի միջազգային հաստատության (IFES) հայաստանյան մասնաճյուղի ղեկավարին և Ընտրական համակարգերի միջազգային փորձագիտական կենտրոն (ICES) օտարերկրյա հասարակական կազմակերպությանը:
Արտահերթ նիստում Կենտրոնական ընտրական հանձնաժողովն ուժը կորցրած է ճանաչել Ազգային ժողովի մեծամասնական ընտրակարգով պատգամավորի թեկնածուներ Հայկ Սուլթանյանի (թիվ 35 ընտրատարածք), Հայկ Բարսամյանի (թիվ 38 ընտրատարածք), Կարեն Սմբատյանի (թիվ 11 ընտրատարածք), Սուսաննա Աբրահամյանի (թիվ 40 ընտրատարածք) գրանցումները, ինչպես նաև ՀՀԿ համամասնական ընտրակարգով ընտրական ցուցակում ընդգրկված պատգամավորի թեկնածու Նարինե Միրզոյանի (ընտրական ցուցակի 116-րդ համար) գրանցումը` հիմք ընդունելով վերջիններիս կողմից ներկայացված ինքնաբացարկի մասին դիմումները:
