Ստամբուլում դրական մթնոլորտում են սկսվել ՄԱԿ-ի Անվտանգության խորհրդի հինգ մշտական անդամների, Գերմանիայի պատվիրակության և Իրանի միջև միջուկային ծրագրի վերաբերյալ բանակցությունները:
ԵՄ ներկայացուցիչ Մայքլ Մաննի խոսքերով` բանակցության մասնակիցները իրական արդյունքի հասնելու ցանկություն են դրսևորել:
Այդուհանդերձ, արտասահմանյան լրատվամիջոցները կարծում են, որ իրանական պատվիրակության հետ բանակցությունները շոշափելի արդյունքներ չեն տալու: Նրանք վստահ են, որ բանակցությունները լավագույն դեպքում կնպաստեն, որ ապագայում նոր բանակցությունների հերթական փուլ սկսվի:
Հավելենք, որ այսօրվա հանդիպումը առաջինն է վերջին 15 ամիսների ընթացքում: Թեհրանի հետ նախորդ բանակցությունները, որոնք ևս Ստամբուլում են անցկացվել, անարդյունք են ավարտվել:
ԱՄՆ-ն և Արևմուտքի մի շարք այլ երկրներ Իրանին մեղադրում են միջուկային զենքի ստեղծման փորձերի մեջ: Թեհրանը բոլոր մեղադրանքները հերքում է և հայտարարում, որ միջուկային ծրագիրը միտված է երկրի էներգիայի պահանջարկի բավարարմանը:
