Նախընտրական շրջանում քաղաքական ուժերի միջև հավասար մրցակցություն չկա և միամտություն կլիներ մտածել, որ կլինի: Այսօր կայացած մամլո ասուլիսի ժամանակ ասաց Հայ ազգային կոնգրեսի անդամ Վահագն Խաչատրյանը:
«ՀԱԿ-ը քաղաքական ճիշտ որոշում կայացրեց՝ պատգամավորության թեկնածուներ առաջադրելով նաև մեծամասնական ընտրակարգով: Թիվ 8 ընտրատարածքում, որտեղ ես եմ առաջադրված, մարդիկ մի փոքր վախեցած են, բայց վստահ եմ, որ երբ դուրս գանք բակային հանդիպումների՝ պատկերն ավելի պարզ կդառնա: Միանշանակ է, որ ընտրողները դժգոհ են երկրում առկա իրավիճակից ու իշխանություններից, նրանք ձգտում են օր առաջ հեռանալ Հայաստանից: ՀԱԿ-ի պայքարը չորս տարի եղել է փողոցում, իհարկե՝ ոչ մեր ցանկությամբ, և հիմա էլ մեր առաջնային խնդիրը՝ հասնել իշխանափոխության, չի փոխվել»,- ասաց նա:
Վահագն Խաչատրյանի խոսքով, իշխանությունը պետք է կարողանար զսպել իրեն և նախընտրական շրջանում զերծ մնար վարչական ռեսուրսները գործի դնելու պրակտիկայից: «Բողոքողի տպավորություն չեմ ուզում թողնել, ՀԱԿ-ը պատրաստ է պայքարել նաև այս պայմաններում: Մենք իսկապես ճահճի մեջ ենք, կարիք կա ոչ ավանդական լուծումների: Այդ առումով շատ կարևոր է երիտասարդների դերը, սակայն ԱԺ-ում եղած երիտասարդների որակը գոհացուցիչ չէ»,- նշեց ՀԱԿ անդամը:
Ընդդիմադիր գործիչը հայտարարեց, որ հեռուստաբանավեճի պատրաստ է իր բոլոր մրցակիցների հետ: «Ես նույն ընտրատարածքից պատգամավոր եմ ընտրվել երկու անգամ: Պարզ եմ ասում, բակային հանդիպումների ժամանակ խոստումներ չեմ տալու, որ ասֆալտ կանեմ և այլն, կարծում եմ, սակայն, իմ խոսքը Մալաթիա-Սեբաստիա համայնքի բնակիչների մոտ ազդեցիկ կլինի»,- ասաց Խաչատրյանը:
Նրա համոզմամբ՝ իշխանությունն ու բիզնեսը համատեղելի չեն, մինչդեռ իշխանության խոստումը՝ տարանջատել այդ երկուսը և իրենց ցուցակներում գործարարներ չներառել, իրականություն չդարձավ նաև այս անգամ: