Թիվ 8-րդ ընտրատարածքում առաջադրված ՀՅԴ թեկնածու Արթուր Եղիազարյանը «Առաջին լրատվական»-ի հետ զրույցում գալիք ընտրություններում հաղթելու իր հնարավորությունները բավական բարձր գնահատեց: Ըստ նրա՝ դա է պատճառը, որ մտել է պայքարի մեջ:
Անդրադառնալով իր ընտրարշավին` նա ասաց, որ այն նոր է սկսվել, և դժվար է ասել՝ ընտրատարածքում կա՞ն հավասար պայմաններ բոլոր թեկնածուների համար, թե՞ ոչ: «Այս գործընթացը դեռ նոր է, և հստակ դիրքորոշում դժվար է հայտնել: Գալիք շաբաթվա ընթացքում դա ավելի տեսանելի կլինի»,- նկատեց թեկնածուն:
Խոսելով նախընտրական պայքարից և քարոզչությունից` Արթուր Եղիազարյանն ասաց, որ այս օրերի ընթացքում հասցրել են նախապատրաստել բուկլետները, դրանք արդեն տպագրման փուլում են, իսկ դրանից հետո սկսվելու են բակային հանդիպումները: Նա ընդգծեց, որ պաշտոնական քարոզարշավ դեռ չեն անում:
«Հիմա մեր ամենակարևոր խնդիրն այն է, որ արդար ընտրություններ լինեն: Մեր ընտրատարածքում նախորդ տարիներին գրանցվել են միջադեպեր, պետք է փորձենք այս ընտրություններին այնպես անել, որ բացառված լինեն նման միջադեպերը: Առաջնային խնդիրն արդար ընտրություններն են»,- նշեց Ա. Եղիազարյանը:
Հիշեցնենք, որ թիվ 8 ընտրատարածքում առաջադրված են նաև ՀԱԿ թեկնածու Վահագն Խաչատրյանը, ՀՀԿ-ից Կորյուն Նահապետյանը և անկուսակցական Գագիկ Պետրոսյանը:
