Հետազոտողները պարզել են, թե մարդիկ ինչու են սիրում դիտել ֆիլմեր, որոնցում գլխավոր հերոսները մահանում են, կամ որոնցում ողբերգություն է տեղի ունենում:
Daily Mail-ը գրում է, որ ԱՄՆ-ի Օհայոյի պետական համալսարանի հետազոտողներն ուսումնասիրություն են անցկացրել ուսանողների շրջանում` նրանց խնդրելով դիտել Atonement ֆիլմը։ Այնուհետև հարցեր են տվել։
Ֆիլմում պատմվում է սիրահար մի զույգի մասին, որոնց բաժանում են իրարից, և հետո նրանք երկուսն էլ սպանվում են պատերազմում:
Վերլուծելով ուսանողների պատասխանները` գիտնականները պարզել են, որ մարդիկ հաճույք են ստանում ողբերգություններից, քանի որ դրանք նրանց ստիպում են ուշադրություն դարձնել կյանքի դրական կողմերի վրա: Ֆիլմը դիտելով՝ մարդիկ գիտակցում են, որ իրենց կյանքն այնքան էլ վատը չէ իրականում:
Ֆիլմը դիտելիս անձը կենտրոնանում է իր սեփական կյանքի, զգացմունքների վրա, և դա ազդում է նրա վրա, թե ինչպես է նա ընկալում ֆիլմը:
