Грузия Online-ի փոխանցմամբ՝ վրացի ընդդիմադիր միլիարդատեր, «Վրացական երազանք» քաղաքական կոալիցիայի առաջնորդ Բիձինա Իվանիշվիլին օգտվելու է սահմանադրական փոփոխություններից և մասնակցելու է աշնանը կայանալիք խորհրդարանական ընտրություններին: Այս մասին հայտարարել է Իվանիշվիլիի փաստաբան Արչիլ Կբիլաշվիլին:
Վերջինս ընդգծել է, որ ընտրությունների մասին օրենքում փոփոխություններ մտցնելը Վրաստանում ծնված կամ 10 տարի անընդմեջ բնակված ԵՄ-ի քաղաքացիներին հնարավորություն կտա մասնակցել ընտրություններին. «Չնայած դրան՝ Բիձինա Իվանիշվիլին ամեն դեպքում դիմելու է Թբիլիսիի քաղաքային դատարան՝ իր քաղաքացիության վերականգնման հարցով: Մենք հայց ենք ներկայացնելու ոչ թե նրա համար, որ ակնկալում ենք օբյեկտիվ որոշում, այլ նրա համար, որ նշանակվի սկզբունքային ու հետևողական գործընթաց»:
Հիշեցնենք, որ Վրաստանի արդարադատության նախարարությունն Իվանիշվիլիին հայտնել է, որ նա կարող է ստանալ միայն երկքաղաքացիություն, քանի որ հանդիսանում է այլ երկրի (Ֆրանսիա) քաղաքացի:
