Եվրոպայի խորհրդի մարդու իրավունքների հանձնակատար Թոմաս Համարբերգը մամուլի ասուլիսի ժամանակ հայտարարեց, որ միջազգային համաձայնագրերում գոյություն չունի «քաղբանտարկյալ» եզրույթը, և ինքը չի կարող այն օգտագործել: «Արդյոք այն կներառե՞ր այն շարժառիթը, որը կբնութագրեր այն գործունեությունը, որի դեպքում մարդը բանտարկվել է իր հայացքների համար»,- հարցրեց Թոմաս Համարբերգը: Նա նշեց, որ մարտի 1-ի գործով կայացրած դատավճիռներում եղել են քաղաքական նկատառումներ, քաղաքական տարածաչափ: Լրագրողների հարցին, թե հնարավո՞ր է, որ մարտի 1-ի սպանությունների հանգամանքները չբացահայտելը հիմք դառնա Հայաստանի նկատմամբ պատժամիջոցներ կիրառելու համար, պարոն Համարբերգը պատասխանեց. «Ես իրավասու չեմ առաջարկելու կամ չառաջարկելու պատժամիջոցներ կիրառել որևէ երկրի նկատմամբ»: Նա ասաց, որ Հայաստանի խնդիրները շարունակում են մնալ Եվրոպայի խորհրդի ուշադրության կենտրոնում և նպատակահարմար չէ պատժելը: Անդրադառնալով 2008 թ. մարտիմեկյան իրադարձություններից հետո իր իսկ առաջարկած փաստահավաք խմբի ստեղծմանը` պարոն Համարբերգը ասաց, որ չնայած այդ խմբի աշխատանքն օգնեց ԱԺ-ում Սամվել Նիկոյանի գլխավորած հանձնաժողովին, սակայն նրա գործունեությունն արդյունավետ չեղավ: Նա կարծիք հայտնեց, որ մարտի 1-ի դեպքերը քննող ԱԺ ժամանակավոր հանձնաժողովը պետք է քններ նաև այդ իրադարձությունների քաղաքական ասպեկտը, դատախազությունից և քննչական ծառայությունից ստացած փաստերի հիման վրա աներ համապատասխան եզրակացություններ: ԵԽ մարդու իրավունքների հանձնակատարը նշեց, որ ՀՀ դատախազությունն ու քննչական ծառայությունն են կրում պատասխանատվություն, և հենց նրանք էլ պետք է պարզեն, թե ով կրակեց և ինչու: «Ես չեմ կարծում, թե Եվրոպայի խորհուրդը պետք է պատասխանատվություն վերցնի այդ երկու մարմինների գործունեության համար»,- ասաց նա: