ԱԺ ՀՀԿ խմբակցության ղեկավար Գալուստ Սահակյանը իր գործընկերներին՝ Սամվել Ալեքսանյանին և Ռուբեն Հայրապետյանին, խորհուրդ չի տալիս գնալ բանավեճի: Այս մասին նա հայտարարեց՝ պատասխանելով «Առաջին լրատվական»-ի հարցին, թե կհամաձայնե՞ն արդյոք Նիկոլ Փաշինյանի արձագանքին՝ ի պատասխան Ռուբեն Հայրապետյանի երեկ արված բանավեճի հրավերի:
«Մենք բանավեճի խնդիր չունենք, փորձում են բանավիճել նրանք, որոնք ձայների գրեթե հավասար չափ ունեն: Ես կարծում եմ, որ սխալ կլինի այդսպես ցաքուցրիվ բանավեճերի ճանապարհով գնալ, ու առանց էն էլ գրգռված ժողովրդին ավելի ջղաձգել: Ինչո՞ւ եմ այդպես ասում, որովհետև գոնե այնպես պետք է արվի, որ ժողովուրդը հանգիստ մասնակցի: Որևէ բանավեճից ընդամենը խոսակցությունը հետևյալն է՝ այ տեսա՞ր ինչ ասեց, այ տեսար ո՞նց պատասխանեց, այ էստեղ տակ տվեց, այ էստեղ վրա տվեց: Այսինքն, թամաշայի մոտեցում է առաջանում»,- ասաց Գալուստ Սահակյանը։
Անդրադառնալով այն դիտարկմանը, թե տարիներ առաջ Սերժ Սարգսյանը բանավիճել էր Արտաշես Գեղամյանի հետ, Սահակյանը պատասխանեց՝ յուրաքանչյուր ժամանակ ունի իր յուրահատկությունը:
