«Բարգավաճ Հայաստան» կուսակցության պատգամավոր Ռուստամ Գասպարյանը կարծում է, որ Gallup International Association-ը լուրջ և վստահություն ներշնչող կազմակերպություն է և մայիսի 6-ի ընտրություններին ընդառաջ անցկացնելիք նրա սոցհարցման ու «էքզիտ-փոլի» արդյունքները առավելագույնս ճշգրիտ կլինեն: Այս մասին պատգամավորն ասաց «Առաջին լրատվական»-ի հետ զրույցում:
«Կարծում եմ՝ իրենց հարցումները ճիշտ արդյունքներ են ցույց տալու: Ամեն դեպքում, ժողովուրդն արդեն գիտի՝ ում և ինչպես է ընտրելու, այնպես որ, սոցհարցում պետք էլ չէ»,- նշեց Ռուստամ Գասպարյանը: Ամփոփելով՝ պատգամավորը նկատեց, որ սոցհարցման ու «էքզիտ-փոլի» պատվիրաուի՝ «Արմենիա» հեռուստաընկերության մասով ոչինչ ասել չի կարող:
Հիշեցնենք, որ «Արմենիա» հեռուստաընկերությունը և Gallup International Association-նն օրերս պայմանագիր են ստորագրել ըստ որի` Gallup սոցիոլոգիական հետազոտությունների կենտրոնը մայիսի 6-ին կայանալիք ԱԺ ընտրությունների առիթով կիրականացնի սոցիոլոգիական հարցում և «էքզիտ-փոլ»: Խորհրդարանական ընտրությունների քարոզարշավի ընթացքում անցկացված հարցման արդյունքները կհրապարակվեն ոչ ուշ, քան մինչև ապրիլի 27-ը: Սոցիոլոգիական հարցումը կիրականացվի Երևանում և Հայաստանի մարզերում, «էքզիտ-փոլը» կիրականացվի մայիսի 6-ին՝ ընտրությունների օրը, պարզելու ընտրական իրավունք ունեցող և ընտրությանը մասնակցած ՀՀ քաղաքացիների քաղաքական նախասիրությունները: