«Ժառանգության» և «Ազատ դեմոկրատների» միասնական համամասնական ցուցակի ներկայացուցիչները Կոտայքի մարզում շարունակում են իրենց այցելությունը և կանգառ կատարեցին Բյուրեղավանում, Նոր Հաճընում և Եղվարդում:
Ամենուր նրանց սպասում էին տեղի բնակիչները, և տեղի էին ունենում ինքնաբուխ հանրահավաքներ: Եղվարդում բնակիչներին ողջունեցին Ժառանգության առաջնորդ Րաֆֆի Հովհաննիսյանը, ԱԺ նախկին փոխխոսնակ Կարապետ Ռուբինյանը, «Ազատ դեմոկրատներ» կուսակցության անդամ, նախկին արտգործնախարար Ալեքսանդր Արզումանյանը, ԱԺ Ժառանգության խմբակցության պատգամավոր Զարուհի Փոստանջյանը, փորձագետ Թևան Պողոսյանը:
Ալեքսանդր Արզումանյանը ողջունելով եղվարդցիներին՝ կոչ արեց մոռանալ բարեգործությունն ու կեղծ բարերարներին և մտածել երկրի ապագայի մասին, որովհետև սա մեր երկիրն է:
«Կեղծ բարերար են, կեղծ ընդդիմադիր, մեկը մյուսին ընդդիմադիր են՝ երկու ձեռք, որոնցից մեկը գողանում է, մյուսը ընդդիմանում: Թոթափեք վախը և մայիսի 6-ին Ձեր սրտի թելադրանքով գիտակից ընտրություն կատարեք»,- ասաց Արզումանյանը՝ հավելելով, որ ինքը կոչ չի անում ընտրել «Ժառանգությանը», այլ նրան, ում ուզում են, բայց դա լինի գիտակցված, ոչ թե վախով թելադրված ընտրություն:
