Իրանական Press TV-ի փոխանցմամբ՝ Իրանը, ի պատասխան հունվարի 23-ին ԵՄ-ի կողմից իր նավթի ներկրման վրա սահմանված բեռնարգելքի, արգելել է եվրոպական 100 ընկերությունների ապրանքների ներկրումը: Այս մասին հայտարարել է Իրանի Առևտրի զարգացման կազմակերպության ղեկավարի տեղակալ Սասան Խադեին:
Վերջինիս խոսքերով՝ Իրանի սահմանած պատժամիջոցներն առաջին հերթին առնչվում են շքեղության առարկաներին, որոնք կարող են արտադրվել նաև Իրանում: Նշվում է, որ նախորդ տարում (2011 թվականի մարտի 21-ից մինչև 2012 թվականի մարտի 21-ը) Իրանը ներկրել է մոտ 500 ապրանքատեսակ և արտահանել է մոտ 3600 ապրանքատեսակ: Նախորդ տարի Իրանը ներկրել է 69 երկրից և արտահանել է դեպի 169 երկիր:
Հիշեցնենք, որ իրանական նավթի ներկրման վրա ԵՄ-ի սահմանած բեռնարգելքն ամբողջովին գործելու է հուլիսի 1-ից: Սակայն չսպասելով դրան՝ Իրանն այս շաբաթ դադարեցրել է իր նավթի մատակարարումը Հունաստանին, Իսպանիային, Գերմանիային ու Իտալիային: Ավելի վաղ իրանական նավթից զրկվել էին Ֆրանսիան ու Մեծ Բրիտանիան:
