ԱՄՆ Փենսիլվանիա նահանգի համալսարանի հետազոտական խմբի անցկացրած ուսումնասիրությունների արդյունքում պարզվել է, որ համացանցում մերժում ստացած մարդիկ նույնքան վատ են զգում, որքան վատ կզգային, եթե իրական կյանքում մերժվեին: Ինչպես տեղեկացնում է rosbalt.ru-ն, գիտնականներն ուսումնասիրել են, թե ինչպիսի հույզեր են առաջանում մարդկանց մոտ՝ վիրտուալ շփումներում և իրական կյանքում արհամարհվելիս:
Առաջին փորձին մասնակցել է 275 ուսանող: Նրանք պետք է պատմեին իրենց զգացողությունների մասին, որոնք առաջացել են չաթից կամ որևէ խմբից իրենց պրոֆիլի մերժման հետևանքով: Բոլոր հարցվածները խոստովանել են, որ դա իրենց համար ընկճախտի պատճառ է դարձել:
Medikforum-ը գրում է, որ հետազոտողները հետևել են նաև այն մարդկանց ռեակցիային, որոնք իրական կյանքում զրուցակիցների կողմից արհամարհվել են: Պարզվել է, որ վիրավորանքն ու հիասթափությունը երկու խմբի համար էլ հավասար է եղել:
Այսպիսով՝ հետազոտողները հերքել են այն առասպելը (միֆը), որ վիրտուալ շփումը մարդու հոգեկան աշխարհի վրա որևէ հետևանք չի թողնում:
