Այսօր կառավարության նիստում վարչապետ Տիգրան Սարգսյանը ներկայացրեց իրականացված բարեփոխումների վերաբերյալ քաղաքացիների իրազեկման «Ես գիտեմ» արշավի արդյունքները:
Ուսումնասիրության արդյունքում պարզվել է, որ 6 բնագավառներում քաղաքացիների ընկալումները՝ բարեփոխումների վերաբերյալ, դրական են:
Ըստ Տ. Սարգսյանի` ամենադրական արդյունքն ավտոմեքենաների տեխզննման գործընթացի բնագավառում է` քաղաքացիների 90%-ը գոհ է արդյունքներից, մանկապարտեզներում և բուհերում բժշկական փաստաթղթերի անհրաժեշտության վերացումից տեղյակ և գոհ է 85%-ը, նոտարական գրասենյակներում ծառայությունների սակագների հստակեցումից և վերահսկումից` 84%-ը։ Այն բանից, որ վարորդական վկայական կարելի է ստանալ՝ մեկ օրինական վայրում վճարում կատարելով և հանձնելով մեկ քննություն, գոհ է քաղաքացիների 82%-ը, կադաստրում անշարժ գույքի առուվաճառքի գործընթացի ժամանակ չափագրումների ոչ պարտադիր լինելուց` 79%-ը:
«Անցկացրեցինք մեծ քարոզարշավ բարեփոխումների վերաբերյալ, որ քաղաքացիներն իմանան իրենց իրավունքները և պաշտպանեն: «Ես գիտեմ» ակցիան տվել է բավականին դրական արդյունք, և քաղաքացիները կարողանում են պաշտպանել իրենց իրավունքները:
Մեծ ժամանակ չի անցել, բայց դրական և շոշափելի արդյունք ունենք, և ծառայություններից օգտվող քաղաքացիների մեծ մասը կարծում է, որ արդյունքները շոշափելի են»,- ասաց վարչապետը` հավելելով, որ շարունակելու են պետական 18 ծառայությունների մոնիթորինգը:
