ИТАР-ТАСС-ի փոխանցմամբ՝ Վրաստանի նախագահ Միխեիլ Սաակաշվիլին թբիլիսյան գործարաններից մեկում անդրադարձել է վրաց երիտասարդության շրջանում ռուսերենի նկատմամբ հետաքրքրության կտրուկ անկմանը.
«Դա պայմանավորված է նրանով, որ ռուսերենը դադարել է հանդիսանալ տեղեկատվական կարևոր աղբյուր: 2004 թվականին վրացի դիմորդների 80 տոկոսն ընդունելության քննությունների համար որպես օտար լեզու էր ընտրել ռուսերենը: Իսկ 20 տոկոսն իր ընտրությունը կատարել է անգլերենի օգտին: Այս տարի անգլերենն ընտրել է դիմորդների 77 տոկոսը, իսկ ռուսերենը՝ միայն 14 տոկոսը:
Ռուսերենն անհրաժեշտ լեզու է, այն պետք է սովորել: Սակայն իրականությունն այն է, որ վերջին տարիներին երիտասարդությունն օտար լեզուների թվում սկսել է նախապատվությունը տալ անգլերենին, քանի որ ռուսերենը զրկվում է տեղեկատվական կարևոր աղբյուրի գործառույթից: Վերջինիս դերում վրաց երիտասարդությունն այժմ տեսնում է անգլերենը:
Ռուսերենն այսօր առաջընթացի լեզու չէ: Նրանք (Ռուսաստանում) նույնպես սովորում են անգլերեն: Քանի դեռ ռուսները կարծում են, որ իրենց անհրաժեշտ է կայսրություն, ռուսերենն ավելի մեծ հետընթաց է ապրելու: Մենք մեր երեխաներին պետք է ուսուցանենք այն լեզուն, որն ավելի առաջավոր է և տեղեկատվական առումով հագեցած»:
Միևնույն ժամանակ, վրացական ընդդիմությունը երիտասարդության շրջանում ռուսերենի նկատմամբ հետաքրքրության կտրուկ անկումը պայմանավորում է Սաակաշվիլիի ռեժիմի վարած հակառուսական քաղաքականությամբ: Ընդդիմադիրներն ընդգծում են, որ Սաակաշվիլին ձգտում է անգլերենը գրեթե դարձնել երկրի երկրորդ լեզուն՝ վրացերենից հետո, ինչպես նաև ձգտում է ուսանելու պայմաններ ապահովել գերազանցապես անգլերենի և ոչ թե մյուս օտար լեզուների համար:
