«Երեկ ՀՀԿ առաջնորդ Սերժ Սարգսյանն աշխատանքային ժամին նախընտրական քարոզարշավի է մեկնել Արմավիրի մարզ: Նա, ինչպես երևանցիներին, այնպես էլ Արմավիրի բնակիչներին խնդրել է հավատալ իրենց և քվեարկել ՀՀԿ-ի օգտին: Սակայն Սերժ Սարգսյանի կողքին կանգնած մարդկանց դեմքերին նայելով` դժվար է ասել, թե արմավիրցիներն ինչքանով հավատացին ՀՀԿ առաջնորդին»,- գրում է «Ժողովուրդ»-ը և հավելում.
«Սերժ Սարգսյանի աջ կողմում Աժ պատգամավորի թեկնածու, գործարար Ալեքսան Պետրոսյանն է` ՄԱՊ-ի Ալիկը, հանուն որի` ապրիլի 6-ին դաժան ծեծի ենթարկվեց թիվ 21 ընտրատարածքում առաջադրված թեկնածու Մերուժան Մխոյանը, որից հետո ինքնաբացարկ հայտնեց: Սարգսյանի հետևից «աջ թիկունքը» պահում է նրա մտերիմ ընկեր, Աժ պատգամավոր Նահապետ Գևորգյանը` Նովոն, որի որդու անունը կապվում է տեղի ունեցած ծեծի հետ: Իսկ ձախ կողմում մարզպետ Աշոտ Ղահրամանյանն է, որի գործունեությունն ուսումնասիրելիս ՀՀ Վերահսկիչ պալատը միլիոնավոր դրամների չարաշահումներ բացահայտեց: Այդ խայտառակությունից հետո սպասվում էր, որ Ղահրամանյանին պետք է բանտ ուղարկեին: Բայց նա, ինչպես երևում է, գոհ ու երջանիկ ապրում է և մի բան էլ` քայլում երկրի ղեկավարի կողքով: Էլ ինչի՞ն հավատանք»,- հավելում է թերթը: