«ՀԺ»-ն գրում է. «Ապրիլի 6-ին Արմավիրի մարզի թիվ 21 ընտրատարածքում մեծամասնական ընտրակարգով պատգամավորի թեկնածու առաջադրված անկուսակցական Մերուժան Մխոյանի առևանգման աղմկոտ միջադեպի վերաբերյալ հարուցված քրեական գործով մինչ օրս որևէ մեկը չի ձերբակալվել, գործում կասկածյալներ նույնպես չկան»:
Այս մասին երեկ թերթին հայտնել են ոստիկանության հասարակայնության հետ կապի և լրատվության վարչությունից:
«Հիշեցնենք, որ դեպքից երկու օր անց Մխոյանը դիմել էր ԸԸՀ և հանել իր թեկնածությունը:
Թերթը զրուցել է Մերուժան Մխոյանի հետ.
-Պարոն Մխոյան, կպատմե՞ք, թե ինչ էր տեղի ունեցել ապրիլի 6-ին:
-Ես ոչ մի բանից տեղյակ չեմ:
-Ձեզ ոստիկանություն հրավիրե՞լ են, ցուցմունք տվե՞լ եք:
-Հրավիրել են, գնացել եմ, ասել եմ, որ ոչ մի բան ես չգիտեմ, ոչ եղել է, ոչ էլ ինձ հետաքրքրում է, թե ինչ է եղել:
-Այսինքն` Սարդարապատի գերեզմանոցի մոտ տեղի ունեցած միջադեպին ներկա չե՞ք եղել:
-Հա… որովհետև… էս աշխարհում արդարություն գոյություն չունի… էդ հարցով: Ի՞նչ ասեմ:
-Այդ դեպքում ինչո՞ւ եք հանել ձեր թեկնածությունը: Ճի՞շտ է, որ ձեզ պարտադրել են տեղի ոստիկանապետն ու դատախազը:
-Դա հեռախոսով խոսալու բան չի:
-Եթե այդ դեպքը չլիներ, ձեր թեկնածությանը կհանեի՞ք:
-Չէ:
-Միայն ձե՞ր անվտանգության հարցն էր դրվել, թե՞ նաև ձեր հարազատների:
-Հեռախոսով չեմ ուզում այդ մասին խոսամ, հետո ավելորդ բաներ որ չլինեն:
-Իսկ միջադեպի հետևանքով լո՞ւրջ վնասվածքներ էիք ստացել:
-Չեմ ուզում խոսալ այդ մասին:
-Հիմա լա՞վ եք:
– Այո:
-Իսկ երկու երիտասարդները, որոնք միջադեպի հետևանքով հիվանդանոց են տեղափոխվել, ովքե՞ր են: Ճի՞շտ է, որ նրանցից մեկի վնասվածքը հասցրել է ձեր որդին:
-Չեմ կարող կոնկրետ ասեմ, մինչև չտեսնեմ, չիմանամ:
-Ոստիկանությունում քրեական գործ է հարուցվել: Քննության ընթացքից տեղյա՞կ եք
-Ոչ մի բանից տեղեկություն չունեմ: