Նախօրեին Ռուբեն Հայրապետյանին պատկանող «Հարսնաքար» համալիրում տեղի ունեցած ՀՀԿ-ական խնջույքի ժամանակ հետաքրքիր միջադեպ է գրանցվել:
«Ժողովուրդ»-ի աղբյուրների փոխանցմամբ` երբ ՀՀԿ առաջնորդ Սերժ Սարգսյանը հերթով բաժակ է բարձրացրել ՀՀԿ կառույցների` այդ թվում Երևանի վարչական շրջանների համար, նկատել է, որ Արաբկիր վարչական շրջանի սեղանը կիսադատարկ է: «Տեղում» չեն եղել ո’չ ղեկավար Հրայր Անտոնյանը, ո’չ էլ մեծամասնական ընտրակարգով առաջադրված թեկնածու Արտակ Սարգսյանը (ՍԱՍ-ի Արտակ): «Իսկ որտե՞ղ են դատարկ աթոռները»,- մնացած 2-3 հոգուց հետաքրքրվել է Սարգսյանը, ինչին ի պատասխան՝ ՀՀԿ Արաբկիրի կառույցի ղեկավար Արմեն Մարտոյանն ասել է, թե «չգիտեմ»:
Վիրավորված այդ իրավիճակից` Սերժ Սարգսյանը հորդորել է «դատարկ աթոռներին փոխանցել` ցտեսություն»: Թե ինչ կարժենա այս ձևակերպումը ՀՀԿ-ական թեկնածու Սարգսյանի և «թաղապետ» Անտոնյանի համար, առայժմ պարզ չէ:
«Ժողովուրդ»-ի տեղեկություններով` երեկ այս առնչությամբ անգամ Երևանի քաղաքապետ Տարոն Մարգարյանի մոտ նիստ է եղել` պարզաբանելու, թե ինչու էին հեռացել Արաբկիրի ՀՀԿ-ականները:
Լուրը ճշտելու նպատակով «Ժողովուրդ»-ը զանգահարել է Հ. Անտոնյանին, սակայն նրա բոլոր հեռախոսահամարներն անհասանելի են եղել:
«Իսկ Երևանի քաղաքապետի մամուլի խոսնակ Շուշան Սարդարյանը տեղյակ չէր միջադեպի մասին»,- հավելում է թերթը:
