Lenta.ru-ի փոխանցմամբ՝ թուրքական Turkish Aerospace Industries (TAI) սկսել է բանակցել պաշտպանության նախարարության հետ Anka տիպի տասնյակ անօդաչու թռչող սարքերի (ԱԹՍ) մատակարարման շուրջ: Պոտենցիալ գործարքի գնի մասին ոչինչ չի նշվում:
Ներկայումս TAI-ն ավարտին է հասցնում Anka-ի թռիչքային փորձարկումները: Anka-ն առաջին անգամ հրապարակավ ցուցադրվել է 2010 թվականին: Anka-ի առաջին թռիչքն իրականացվել է 2011 թվականի սկզբին: Anka-ի մարտական փորձարկումները տեղի են ունենալու այս տարվա հունիսին, Բաթմանի բազայում՝ իսրայելական արտադրության Heron ԱԹՍ-ների հետ միասին:
Anka-ի առավելագույն թռիչքային քաշը 1.5 տոննա է, իսկ օգտակար բեռնվածությունը՝ 250 կիլոգրամ: Anka-ն ի վիճակի է թռչել մինչև 9100 մետր բարձրության վրա և օդում մնալ մինչև 24 ժամ: Anka-ի թևերի բացվածքը կազմում է 17.3 մետր: Anka-ի նախագծի մշակումը գնահատվում է 107 միլիոն դոլար:
2011 թվականի սեպտեմբերին Anka-ի նկատմամբ հետաքրքրություն էր ցուցաբերել Եգիպտոսի պաշտպանության նախարարությունը:
Հիշեցնենք, որ երկու շաբաթ առաջ Թուրքիայի պաշտպանական արդյունաբերության ենթաքարտուղարությունը ներկայացրել է ռազմավարական հնգամյա պլանը, որում նշված էր, որ Anka-ն Թուրքիայի զինված ուժերը համալրելու է 2014 թվականին:
