Այսօր «Արմենիա» հեռուստաընկերությունը և Gallup International Association-ը ստորագրեցին պայմանագիր, ըստ որի` Gallup սոցիոլոգիական հետազոտությունների կենտրոնը մայիսի 6-ին կայանալիք ԱԺ ընտրությունների առիթով կիրականացնի սոցիոլոգիական հարցում և «էքզիտ փոլ»:
Ինչպես լրագրողների հետ հանդիպմանը նշեց Gallup International Association-ի փոխնախագահ Կանչո Ստոյչևը, խորհրդարանական ընտրությունների քարոզարշավի ընթացքում անցկացված հարցման արդյունքները կհրապարակվեն ոչ ուշ, քան մինչև ապրիլի 27-ը: Սոցիոլոգիական հարցումը կիրականացվի Երևանում և Հայաստանի մարզերում, «էքզիտ փոլը» կիրականացվի մայիսի 6-ին՝ ընտրությունների օրը՝ պարզելու ընտրական իրավունք ունեցող և ընտրությանը մասնակցած ՀՀ քաղաքացիների քաղաքական նախասիրությունները:
Ստոյչևի խոսքով՝ սոցիոլոգիական հարցման շեղումը մոտ 3 տոկոս է, «էքզիտ փոլ»-ինը՝ 2 տոկոս: Նա նշեց՝ եթե քաղաքացիների շրջանում վախի մթնոլորտը մեծ է, ապա, իհարկե, արդյունքները կարող են չհամապատասխանել իրականությանը, սակայն իրենց գնահատականով՝ Հայաստանում կարելի է անցկացնել «էքզիտ փոլ»: «էքզիտ փոլ»-ը հարցումներն անցկացնելու է ընտրանքային եղանակով` ոչ բոլոր տեղամասերում:
«Արմենիա» հեռուստաընկերության գլխավոր տնօրեն Դավիթ Ավետիսյանը նշեց, որ հայտարարվել էր բաց մրցույթ, որի ընթացքում հաղթել էր Gallup-ը, սակայն բանախոսները հրաժարվեցին նշել հարցումների համար վճարվելիք գումարը:
