«Հրապարակ»-ը գրում է, որ ապրիլի 6-ի լուսադեմին ծեծի ենթարկված թիվ 21 ընտրատարածքի պատգամավորության թեկնածու Մերուժան Մխոյանը ապրիլի 7-ի կեսօրին ինքնաբացարկի դիմում է ներկայացրել ընտրատարածքային ընտրական հանձնաժողով:
«Մխոյանին ծեծի էին ենթարկել, քանի որ նա հրաժարվել էր հանել իր թեկնածությունը և չխոչընդոտել ՀՀԿ-ական թեկնածու Ալեքսան Պետրոսյանի ընտրությանը: Քանի որ Մխոյանը հրաժարվեց դա անել առանց բռնության և ուժի գործադրման, նրան ուղղակի ստիպեցին:
Մերուժան Մխոյանն ուղեղի ցնցում է ստացել:
Թվում է, թե ծեծից հետո Մխոյանը պետք է լցվեր վճռականությամբ, և ընտրություններին մասնակցելու և հաղթելու նրա կամքը պետք է որ ավելի ամրապնդվեր: Մանավանդ, որ ծեծից հետո նրա վարկանիշը զգալիորեն բարձրացել է. հասարակությունը միշտ էլ պաշտպանում է ծեծվածին և հետապնդվողին:
Ընտրողները հասկացան նաև, որ եթե Մխոյանին պարտադրում են հրաժարական տալ, նշանակում է, որ նա իրենից լուրջ ուժ է ներկայացնում: Մի խոսքով, բոլորի համար հասկանալի էր, որ եթե մինչև ծեծը Մերուժան Մխոյանն ընտրություններում հաղթելու քիչ հնարավորություն ուներ, ապա ծեծից հետո նրա հնարավորությունները կրկնապատկվել էին:
Բայց Մերուժան Մխոյանը պարտադրված է եղել ինքնաբացարկ ներկայացնել, քանի որ նրա որդին` Արթուր Մխոյանը, դանակահարել է իր հորը ծեծի ենթարկողներին:
Արդեն գրել ենք, որ Մխոյանին տարել են Սարդարապատի գերեզմանատուն և դաժան ծեծի ենթարկել` պահանջելով, որ նա ինքնաբացարկի դիմում ներկայացնի: Որդին, օգնության հասնելով հորը, դանակահարել էր նրան ծեծողներին: Ոստիկանությունը կարող էր քրեական գործ հարուցել երկու կողմերի նկատմամբ էլ, և այդ դեպքում պետք է ձերբակալվեին և քրեական գործեր հարուցվեին և թեկնածուին ծեծողների, և դանակարողի նկատմամբ: Բայց քանի որ ոստիկանությանը հետաքրքրում է ոչ թե օրենքն ու օրինականությունը, այլ ընդամենը իշխանության արդի քաղաքական շահերի սպասարկումը, նրանք Մերուժան Մխոյանին պարզ գործարք են առաջարկել. դու ինքնաբացարկ ես ներկայացնում` որդիդ ազատվում է քրեական հետապնդումից:
Մխոյանը կարող էր հրաժարվել գործարքից և փորձել շարունակել պայքարը, բայց այդ դեպքում որդին, որպես քրեական հանցագործ, կհայտնվեր կալանավայրում»:
