Ժաննա Կալմոնը (1875 փետրվար–1997 օգոստոս) սահմանել է երկարակեցության համաշխարհային ռեկորդ` 122 տարի և 164 օր: Նա ծնվել է Օրլիում: Երբ կառուցել են Էյֆելյան աշտարակը, նա եղել է 14 տարեկան։ Այս մասին գրում է lookatme.ru կայքը:
Մադամ Կալմոնը միշտ ակտիվ կենսակերպ է վարել։ 85 տարեկան հասակում նա զբաղվել է սուսերամարտով, իսկ 100 տարեկանում հեծանիվ է քշել: Նա ամուսնացած է եղել իր զարմիկի հետ, նրանք միասին ապրել են 46 տարի: Կալմոնն իր աղջկանից և թոռից երկար է ապրել:
Կալմոնի մասին ամբողջ աշխարհն իմացավ 1988 թվականին, երբ Վան Գոգի հարյուրամյա տարելիցին նվիրված հարցազրույցում նա պատմեց, թե ինչպես է 14 տարեկանում հանդիպել նկարչի հետ: «Նա կեղտոտ էր, վատ հագնված և մռայլ»,– նկարչի մասին ասել էր Ժաննան: Նա եղել է նաև Հյուգոյի թաղմանը:
Կալմոնը դարձել է աշխարհի ամենածեր դերասանուհին. 114 տարեկանում նա նկարահանվել է «Վինսենթը և ես» փաստագրական ֆիլմում: Եղել է վիրաբույժների ամենածեր հիվանդը. 115 տարեկանում ազդրի վիրահատություն է տարել:
Ժաննան ծխելը թողել է 117 տարեկան հասակում: Սակայն ոչ այն պատճառով, որ իրեն վատ է զգացել: Պարզապես նա, որ գրեթե ամբողջովին կորցրել էր տեսողությունը, անհարմար էր զգում ամեն անգամ ուրիշներից ծխել խնդրելուց: Մինչև 110 տարեկան հասակը Ժաննան ինքն էր իր մասին հոգ տանում, հետո նա տեղափոխվեց ծերանոց:
Մադամ Կալմոնն ասում էր «Աստված մոռացել է իմ մասին։ Ես երիտասարդ չէի դեռ 100 տարի առաջ»:
Երբ Ժաննային իր 120-ամյակի օրը հարցրել էին, թե իր կարծիքով՝ ինչպիսի՞ն կլինի իր ապագան, մադամը պատասխանել էր. «Շատ կարճ»:
