Գալիք ընտրություններին օրակարգ թելադրող է լինելու Facebook-ը: Այսօր «Առաջին լրատվական»-ի հետ զրույցում ասաց բլոգեր Արթուր Պապյանը`խոսելով գալիք ընտրություններին բլոգոսֆերայի դերի և ներկայիս նախընտրելի պլատֆորմների շուրջ:
Ըստ Արթուր Պապյանի՝ ամենակարևորն այն է, որ այս տարի, ի տարբերություն 2007-ի ընտրությունների նախընտրական փուլի, բլոգոսֆերան բավական պասիվ է քաղաքական հրապարակումների առումով: Նա ասաց, որ եթե 2007 թվականին մինչ ընտրությունները բլոգերում մեծ քննարկումներ էին ծավալվում, բազմաթիվ հրապարակումներ կային ընտրությունների մասին, ապա ապրիլի 7-ի դրությամբ նման ակտիվություն չկա: Նրա կարծիքով` կամ բլոգերները շատ են հոգնել քաղաքականությունից, կամ առանձնապես չեն կարևորում այս ընտրությունները, այդ պատճառով նման վերաբերմունք են դրսևորում:
«Ես որպես բլոգեր առանձնապես հավես չունեմ քաղաքական հրապարակումների համար: Պատճառն այն է, որ նայում եմ քաղաքական ուժերի ընտրացուցակներին և չեմ գտնում, որ դրանցով ինչ-որ բան փոխելու հնարավորություն կա: Կուսակցությունները չեն ցանկացել իրենց ամբողջ ներուժը կենտրոնացնել ընտրացուցակների վրա, այլ, երևի թե, սպասում են նախագահական ընտրություններին: Հիմա տեսնում եմ, որ Հայաստանում առողջ քաղաքական գործընթացներ գնում են հասարակական-քաղաքացիական ֆոնի վրա: Հետաքրքիր զարգացումները Մաշտոցի պուրակում են, երբ նայում եմ և տեսնում, թե կուսակցություններն ինչ ունեն առաջարկելու, ես չեմ տեսնում, թե կուսակցություններն են այն ուժը, որն այս երկրում կարող է ինչ-որ բան փոխել: Ինձ համար Մաշտոցի պուրակը ավելի քաղաքական, քաղաքացիական, երկիրը փոխելու տեսակետից կարևոր նշանակություն ունի, քան ցանկացած կուսակցության առաջարկած ինչ-որ մի բան»,- մեկնաբանեց Արթուր Պապյանը` ընդգծելով, որ այսօր երկրի համար շատ կարևոր հարցեր բարձրացնողը քաղաքացիական հասարակությունն է, քան որևէ կուսակցություն:
Բլոգերը բլոգոսֆերայի պասիվության մեջ տեսնում է նաև Facebook-ի մեղքը: Նա հիշեց, որ նախորդ ընտրությունների ժամանակ կար Livejournal-ը, որն ակտիվ համայնք էր, և առանձնապես այլ պլատֆորմներ չկային, որտեղ հայերի մեծ քանակ կար և պատրաստ էր քննարկումների: Իսկ այսօր, ըստ նրա, Facebook-ը ամենակուռ պլատֆորմ է, տեխնոլոգիապես շատ ավելի հարմար, որի պատճառով բլոգերներն իրենք ևս շատ իմաստ չեն տեսնում քննարկումներ ծավալել բլոգերում, քանի որ ավելի շատ լսարան կա Facebook-ում:
«Գալիք ընտրություններին ավելի հետաքրքիր կլինի ֆեյսբուքահայության պահվածքը, քան բլոգոսֆերան, բլոգերը: Տեխնոլոգիապես, շատ այլ հարցերով բլոգերը թեև կարևոր են, բայց բուն քննարկումները ծավալվում են Facebook-ում, դա ամենակարևոր դինամիկան է այս պահին տեխնոլոգիական առումով, իսկ բովանդակային առումով բոլորը հոգնած են քաղաքականությունից»,- նշեց Ա. Պապյանը`հավելելով, որ բլոգերը կարևոր դեր կարող են խաղալ այն դեպքում, երբ Facebook-ը փակեն, իսկ եթե իրավիճակը շարունակվի այնպես, ինչ մինչև այժմ, բլոգերում հրապարակումներ անելու վրա ժամանակ, ջանքեր ծախսելն իմաստ չունի:
Հարցին՝ ինչքանո՞վ են այսօր բլոգերն օգտագործվում քաղաքական PR նպատակներով, պատասխանեց, որ ընտրացուցակներում բազմաթիվ թեկնածուներ կան, ովքեր բլոգերն օգտագործում են այդ նպատակներով, բայց շատ չեն: Նրա խոսքով` դա նաև արդյունավետ չէ: «Եթե ինչ-որ կուսակցություն ջանքեր գործադրի, որ ինչ-որ բլոգերների միջոցով քննարկումներ իրականացնի, տակտիկական սխալ կանի: Օն-լայն քննարկումների և օն-լայն համայնքի համար գալիք ընտրություններին օրակարգ հաստատող է լինելու Facebook-ը»,- ասաց Ա. Պապյանը:
