Բրիտանացի գրող Հովարդ Ջեյքոբսոնը` Բուկերովյան մրցանակի դափնեկիրը, հանդես է եկել ի պաշտպանություն իսրայելական «Գաբիմա» թատրոնի, որի ելույթները վտանգի տակ էր հայտնվել լոնդոնյան Globe to Globe փառատոնում: Այն տեղի կունենա 2012թ. գարնանը Շեքսպիրյան համաշխարհային փառատոնի շրջանակում:
Ինչպես գրում է The Guardian պարբերականը, գրողի վրդովմունքը հարուցել է այն փաստը, որ Globe to Globe-ի ղեկավարության հասցեով եկել է նամակ` պահանջելով թատրոնի խաղացանկից հանել ներկայացումն այն բանի պատճառով, որ «Գաբիման»` երկրի հնագույն խաղացանկային թատրոնը, ավելի վաղ ներկայացումներ է խաղացել իսրայելական բնակավայրերում»: Ջեյքոբսոնի կարծիքով` արվեստը ոչ մի պարագայում չպետք է ենթարկվի գրաքննության:
Globe to Globe մասշտաբային նախագծի իմաստն այն է, որ լոնդոնյան «Գլոբուս» թատրոնի բեմում 6 շաբաթ շարունակ Շեքսպիրի պիեսներով հանդես գան 37 թատերախումբ ու ներկայացուցիչ աշխարհի տարբեր երկրներից:
«Գաբիման» Լոնդոնում պետք է հանդես գար «Վենետիկի վաճառականը» ներկայացումով:
Հիշեցնենք` մարտի 29-ին The Guardian-ը հրապարակել էր մեծ Բրիտանիայի արվեստի 37 գործիչների բաց նամակը, որտեղ պահանջվում էր չեղյալ հայտարարել «Գաբիմայի» հրավերը: Նամակն ստորագրած մարդկանց թվում էին օրինակ` Էմմա Թոմփսոնը, ռեժիսոր Մայք Լին ու դերասան Մարք Ռիլանսը:
Բացի այդ՝ մի շարք քննադատներ ու գրողներ հանդես են եկել ի պաշտպանություն թատրոնի` հավելելով, որ արվեստը պետք է լինի ազատ:
«Գլոբուսն» արդեն հայտարարել է, որ չի պատրաստվում չեղյալ հայտարարել թատրոնի հրավերը, քանի որ դա հակասում է թատրոնի սկզբունքներին:
.
