News Georgia-ի փոխանցմամբ՝ Վրաստանի փոխարտգործնախարար Նինո Կալանդաձեն այսօր տեղի ունեցած ճեպազրույցում անդրադարձել է 23 տարի առաջ այս օրը Թբիլիսիում տեղի ունեցած իրադարձություններին (արյունոտ կիրակի), որը Վրաստանում նշվում է որպես Անկախության վերականգնման օր:
Այդ օրը խորհրդային բանակի զինծառայողներն արցունքաբեր գազի ու ծանր տեխնիկայի օգնությամբ ցրել էին Թբիլիսիում տեղի ունեցած բազմահազարանոց ցույցը, ինչի հետևանքով զոհվել էր 21 և տուժել էին տասնյակ անձինք:
Դրանից ուղիղ երկու տարի անց՝ 1991 թվականի ապրիլի 9-ին, ազգային շարժման առաջնորդ, Վրաստանի ապագա նախագահ Զվիադ Գամսախուրդիան հայտարարեց Վրաստանի անկախության վերականգնման մասին՝ հենվելով 1918 թվականի մայիսի 26-ին Վրաստանի առաջին հանրապության անկախության հռչակագրի վրա:
Այս կապակցությամբ Կալանդաձեն հայտարարել է. «Այդ օրը դրվեց Վրաստանի անկախության հիմքը: Անկախությունը Վրաստանին տրվում է մեծ դժվարությամբ: Որքան էլ, որ դա կարող է պարադոքսալ հնչել, Վրաստանը դեռ ստիպված է պայքարել անկախության համար»:
