Մի քանի օր գետնի տակ արգելափակված պերուացի 9 հանքափորների փրկության աշխատանքներին ներգրավվել են նրանց գործընկերները: Այս մասին հաղորդում է Associated Press գործակալությունը:
Փրկարարական աշխատանքները , սակայն, կարող են հետաձգվել 2-3 օրով, քանի որ հանքահորում, որտեղ գտնվում են հանքափորները, տեղի է ունեցել նոր փլուզում:
Այս մասին այսօր` ապրիլի 9-ին, հայտարարել է Պերուի վարչապետ Օսկար Վալդեսը: Նոր փլուզումները հայտնաբերվել են շաբաթ, երբ փրկարարներին, ենթադրաբար, հաջողվել է հայտնվել նրանցից 2 մետր հեռավորության վրա:
9 հանքափոր ապրիլի 5-ին իրենց իրականացրած պայթեցման աշխատանքների հետևանքով արգելափակվել էին Cabeza de Negro հանքահորում` Պերուի մայրաքաղաք Լիմայից 325 կմ հարավ:
Նրանք գտնվում են 250-280 մետր խորության վրա: Հանքափորների տարիքը տատանվում է 22-59-ի միջև: Վերջիններիս վիճակը գնահատվում է բավարար: Նրանց սնունդ, թթվածին ու ջուր է հասցվում խողովակի միջոցով:
