Հայաստանում Այռեքսն իրականացնում է ԱՄՆ կառավարության կողմից ֆինանսավորվող Եվրասիայի և Միջին Ասիայի ուսանողների փոխանակման համաշխարհային ծրագիրը (Գլոբալ ՅՈւԳՐԵԴ) 2003 թվականից, իսկ Էդմունդ Ս. Մասկիի անվան կրթաթոշակների ծրագիրը՝ 2004-ից: Երկու ծրագրերով մինչ օրս ԱՄՆ-ում ուսանել են 225 հոգի:
«Առաջին լրատվական»-ի հարցադրմանն ի պատասխան՝ Այռեքս հայաստանյան ներկայացուցչության գրասենյակից հայտնեցին, որ սկսած 2004 թվականից` Եվրասիայի և Միջին Ասիայի ուսանողների փոխանակման համաշխարհային ծրագիրը հնարավորություն է ընձեռել 122 հայ քաղաքացիների մեկ ակադեմիական տարի անցկացնել ամերիկյան համալսարաններում կամ համայնքային քոլեջներում: Ծրագրերի պարտադիր պահանջներից է ծրագրի ավարտից հետո բոլոր մասնակիցների վերադարձը իրենց երկիր:
Փաստելով, որ Հայաստանում աշխատանքի անցնելը հեշտ համարել չի կարելի, Այռեքսից հայտնեցին, որ ծրագրերի շրջանավարտներն աշխատում են տարաբնույթ ոլորտներում, ինչպիսիք են բիզնեսը, շահույթ չհետապնդող կազմակերպությունները, կառավարությունը, կրթությունը և այլն: Ըստ վերջին էլեկտրոնային և հեռախոսային հարցումների տվյալների՝ մոտավորապես 180 Մասկի և Գլոբալ ՅՈւԳՐԵԴ ծրագրերի մասնակիցներ և շրջանավարտներ շարունակում են իրենց կրթությունը՝ մոտ 31%, աշխատում են միջազգային հասարակական կազմակերպություններում՝ մոտ 16%, և տեղական հասարակական կազմակերպություններում՝ մոտ 11%, Հայաստանում գործող միջազգային և տեղական բիզնեսում՝ մոտ 12-ական տոկոս, կառավարությունում՝ մոտ 5%: Այնպիսի ոլորտներում, ինչպիսիք են իրավագիտությունը, առողջապահությունը կամ անհատ ձեռնարկատիրությունը՝ մոտ 5%: Համաձայն մեր ունեցած տվյալների` շրջանավարտների 7%-ից ոչ ավելին չի աշխատում` մի մասը անձնական պատճառներով աշխատանք չփնտրելու հետևանքով:
