Վարչապետ Տիգրան Սարգսյանն օրերս հայտարարեց, թե 2012 թ. առաջին եռամսյակում բյուջեի հավաքագրումները կազմել են 177 մլրդ դրամ, ինչը 2011 թվականի նույն ժամանակահատվածի համեմատ ավելի է 7 մլրդ 570 մլն դրամով։ Կառավարության ղեկավարը վստահեցրել է, թե ծրագիրն ամբողջությամբ կատարվում է:
Ֆինանսների նախարարությունը բյուջեի կատարողականի եռամսյակային ամփոփումը կհրապարակի մոտ 1 ամսից: Հիշեցնենք, որ 2012 թ. հունվար-փետրվարին պետական բյուջեի եկամուտները կազմել են 119.3 մլրդ դրամ կամ եռամսյակային ծրագրի 65 %-ը:
ՀԱԿ ներկայացուցիչ, տնտեսագետ Վահագն Խաչատրյանն «Առաջին լրատվական»-ի հետ զրույցում նշեց, որ նախորդ տարվա հետ համեմատություն անելու համար հարկավոր է ունենալ համադրելի բազա: Նա հիշեցրեց, որ կառավարությունը լուրջ փոփոխություններ էր արել հատկապես ներմուծվող ապրանքների մաքսազերման գների մեջ, ու բոլորը աճի միտում ունեին: Ապրանք արտադրողներից բողոքներ կան, որ արտադրական նպատակներով ներկրվող սարքավորումները, որոնք նախկինում չէին հարկվում, այժմ արդեն հարկվում են:
«Այսինքն, գլխավոր խնդիրը՝ արդյոք բազան նո՞ւյնն է: Մենք համեմատելի՞ թվերի մասին ենք խոսում, որովհետև հարկային փոփոխությունների արդյունքում բազան փոխվում է, հետո ասում են՝ այս տարի ավելի շատ հարկ ենք հավաքել: Պարզ է, որ պետք է ավելի շատ հավաքեին: Բայց մենք չգիտենք նախատեսվածից շատ է հավաքվել, թե պակաս: Մեզ մոտ ստվերայնությունն այնքան մեծ է տնտեսության մեջ, որ բազան եղած բյուջեի եկամտային մասի կրկնակին է: Այսինքն, նվազագույնը կրկնակի բյուջեի չափ կարող ենք հավաքել: Այդ դեպքում, քանի որ այդ բազան չկա, համեմատելը, գլուխ գովելը, հանրությանը ներկայանալը, որ շատ ենք հավաքել, ճիշտ չի»,- ասաց Վ. Խաչատրյանը:
Նրա խոսքով՝ նման հայտարարությունները կարելի է որակել որպես նախընտրական գավազդային: Վ. Խաչատրյանի բնորոշմամբ` մի կարևոր բան էլ կա, որ հայտնի չէ, թե դա ինչքանով է տնտեսության զարգացմանը նպաստել, նաև բաղադրիչները պետք է նայել, թե անուղղակի և ուղղակի հարկերը որքան են:
