Ըստ ՀՀ ոստիկանության ծառայողների իրականացրած աշխատանքների վերաբերյալ հաշվետվության` 2011 թվականի առաջին կիսամյակի ընթացքում հարուցվել է մարդկանց թրաֆիքինգի, շահագործման 10 քրեական գործ, որոնցից 8-ը վերաբերել են կանանց պոռնկությամբ շահագործմանը, 1-ը ՀՀ-ում անչափահասների շահագործմանը` մուրացկանության մեջ ներգրավելու միջոցով, 1-ը ՌԴ-ում ՀՀ քաղաքացիների աշխատանքային շահագործմանը: Պոռնկությամբ շահագործման 8 դեպքերից 5-ը եղել են ներքին թրաֆիքինգի դեպքեր, իսկ երեքի շահագործումը եղել է ԱՄԷ-ում:
Նշված գործերով հայտնաբերվել են և տուժող են ճանաչվել 8 զոհեր, որոնցից 7-ը՝ կանայք: 8 զոհերից 2-ը հանցագործության կատարման ժամանակ եղել են անչափահասներ:
«Առաջին լրատվական»-ի հետ զրույցում Աուդիո-վիզուալ լրագրողների ասոցիացիայի նախագահ Արզուման Հարությունյանը նշեց, որ կա թրաֆիքինգի երեք տեսակ` սեռական, աշխատանքային և մարդու օրգանների թրաֆիքինգ. «Եթե նայենք բացահայտված դեպքերով, Հայաստանում ավելի շատ տարածված է սեռական շահագործումը: Աշխատանքայինը իրականում ավելի շատ է, պարզապես բացահայտված դեպքերն են քիչ: Աշխատանքային թրաֆիքինգը հատկապես տարածված է Ռուսաստանում, իսկ սեռականը` Թուրքիայում և ԱՄԷ-ում»:
