Այսօր երեկոյան, ինչպես «Առաջին լրատվական»-ին տեղեկացրեց տեր Նիկողայոս քահանա Հովհաննիսյանը, կատարվում է ճրագալույցի պատարագ, որից հետո ավետվում է Քրիստոսի հարության լուրը. «Մարդիկ այցելում են եկեղեցի, մասնակցում պատարագին, իբրև Քրիստոսի հարության լույսի խորհուրդ՝ եկեղեցուց մոմեր են տանում տուն»:
Ազգագրագետ Սամվել Մկրտչյանը, խոսելով հայ ընտանիքներում տոնը նշելու մասին, ասաց, որ չնայած եկեղեցիներում է կատարվում Մեծ պահքը լուծելու արարողությունը, բայց վերջնական փակումը կատարվում է տներում. «Մարդիկ զատկական կարմիր ձվերի հետ ճաշակում են նաև փլավ, գինի և ձուկ»:
Նա նշեց նաև, որ հնում ավելի շատ էին այս օրը ծոմ պահողների թիվը, որը տևում էր մինչև ժամերգության ավարտը, իսկ երբ քահանան ասում էր՝ «առեք կերեք, այս է մարմինն իմ» խոսքը, ներկաներն անմիջապես հենց եկեղեցում ուտում էին կարմիր ձվերը:
Ասում էին նաև, որ Ջրօրհնեքի պասը միշտ «ճրագի լույսով» է լուծվում, Զատկինը՝ «արևի լույսով»:
