Ֆրանսիացի լեգենդար շանսոնյե Շառլ Ազնավուրը ժամանել է Նյու Յորք, որտեղ երեք համերգ կտա հայտնի «Սիթի» կենտրոնում: Այս մասին հայտնում է ITAR-TASS գործակալությունը:
Վերջին անգամ երգիչը այդտեղ ելույթ է ունեցել երեք տարի առաջ՝ իր, այսպես կոչված, հրաժեշտի համերգային շրջագայության շրջանակում:
Սակայն ուրբաթ օրը լրագրողների հետ հանդիպմանը Ազնավուրը հայտարարել է, որ իր թե այն ժամանակվա համերգները, թե ներկայիս համերգները հրաժեշտի ելույթներ չեն: «Այդ տերմինը հորինել էր մի լրագրող, ում ես ամենայն հավանականությամբ ձանձրացրել էի: Սակայն նրա մոտ ոչինչ չստացվեց: Ես դեռ այստեղ եմ»,- ժպիտով ասել է երգիչը համերգային շրջագայության կազմակերպիչների` հայտնի իմպրեսարիո Սերգեյ ու Գայանե Դանիլյանների «Արդանի Արտիստս» պրոդյուսերական կենտրոնի կազմակերպած մամլո ասուլիսին:
Չնայած պատկառելի տարիքին (մայիսի 22-ին երգիչը կդառնա 88 տարեկան), երգիչն իրեն հրաշալի է զգում ու պահպանել է հմայքը: Լրագրողների հետ հանդիպմանը շանսոնյեն ժամանել է նախատեսված ժամից 1 ժամ շուտ ու սկսել անկաշկանդ շփվել հավաքվածների հետ: Նա նշել է, որ առայժմ չի որոշել, թե Նյու Յորքում ապրիլի 16-28-ը կայանալիք համերգներին ինչ երգեր է կատարելու: «Ես դեռ չեմ որոշել: Ես կարող եմ երգել տարբեր լեզուներով: Այստեղ` Նյու Յորքում, բացի անգլերենից ու ֆրանսերենից` պահանջարկ ունի նաև իսպաներենը: Այնպես որ, ես դա կորոշեմ վերջին պահին»,- ասել է Շառլ Ազնավուրը:
Շառլ Ազնավուրը ծնվել է Փարիզում հայ ներգաղթյալների`Ազնավուրյանների ընտանիքում: Նրա երաժշտական կարիերային նոր ազդակ է հաղորդել ֆրանսիացի աշխարհահռչակ երգչուհի Էդիտ Պիաֆի հետ ծանոթությունը, ով երգչին հրավիրել է մասնակցել 1946թ. Փարիզում կայանալիք իր համերգներին:
Նրա երգերը կատարել են աշխարհահռչակ երգիչներ Ռեյ Չառլզը, Ֆրեդ Աստերը, Լայզա Մինելին ու այլք: Նա նկարահանվել է 60-ից ավելի ֆիլմերում:
The Time ամսագիրը 1998թ. ու CNN հեռուստաալիքը նրան ճանաչել են 20-րդ դարի լավագույն էստրադային երգիչ:
Հիշեցնենք, որ 1990-ականներին նա Հայաստանի ներկայացուցիչն էր ՅՈւՆԵՍԿՕ-ում, իսկ 2009-ից Շվեյցարիայում Հայաստանի Հանրապետության դեսպանն է:
