Միլիարդատեր Ռիչարդ Բրենսոնի հոլդինգին պատկանող բրիտանական Virgin Atlantic Airways ավիաընկերությունը հետաքննություն է սկսել՝ կապված իր աշխատակիցներից մեկի կողմից պապարացիներին հայտնի մարդկանց ավիատոմսերի մասին տեղեկություն փոխանցելու հետ: Ավելի վաղ հայտնի էր դարձել, որ խոշոր միջազգային ֆոտոգործակալություններից մեկին ուղարկվել են շուրջ 70 հայտնի անձանց, այդ թվում՝ Բրիտանիայի թագուհու թոռան՝ արքայադուստր Բեատրիսի, դերասան Գվինեթ Փելթրոուի, Սքարլեթ Յոհանսոնի և Սիենա Միլլերի տվյալները:
Ինչպես հաղորդում է բրիտանական The Guardian-ը, ավիաընկերության՝ առանձնակի կարևոր հաճախորդների սպասարկման բաժնի կրտսեր աշխատակիցը նախքան իր գործողությունների մասին տեղեկության հրապարակումը հեռացել էր աշխատանքից: Դրանից հետո ավիաընկերությունը հայտարարություն էր հրապարակել, որում իր աշխատակցի դեմ մեղադրանքները որակել էր «ծայրահեղ լուրջ»: Ընկերությունը նաև հաստատել էր, որ այդ առիթով իրենք ներքին քննություն են վարում:
«Հաճախորդների մասին տեղեկության անվտանգությունը մեր առաջնային խնդիրն է,- ասվում է ավիաընկերության հաղորդագրության մեջ: – Դեպքը, որի մասին խոսում էին ԶԼՄ-ները, վերաբերում է 2010թ. տոմս պատվիրած 8 հաճախորդների»:
