Նուբարաշենի թունաքիմիկատների գերեզմանոցը կառուցվել է 1976 թվականին ԽՍՀՄ Մինիստրների խորհրդի որոշմամբ: Այն գտնվում է ակտիվ սողանքային գոտում, բնական ցորենի արգելանոցի անմիջական հարևանությամբ: Գերեզմանոցում թաղված է 600 տոննա թունաքիմիկատ, որից 512 տոննան առաջին և երկրորդ կարգի վտանգավորության նյութեր են: Իսկ վերջին շրջանում բնապահպաններն ահազանգում են¸ որ Նուբարաշենի թունաքիմիկատների գերեզմանոցում ուժեղացել են սողանքային գործընթացները: «Այստեղ սարսափելի սողանքներ են: Իսկ սողանքային գոտում այդպիսի գերեզմանոցները ծանր վնաս կարող են հասցնել մեզ: Բայց ոչ ոք մեր խոսքերին ուշադրություն չէր դարձնում, մինչև չեղավ աղետը: Ինչ-որ մարդիկ ծանր տեխնիկայով մտան ու սկսեցին քանդել գերեզմանոցը»¸- «Առաջին լրատվական»-ին հայտնեց բնապահպան Կարինե Դանիելյանը: Բնապահպանին զարմացնում է հատկապես այն հանգամանքը, որ պարբերաբար լուրեր են տարածվում, թե այնտեղ ոսկի կամ պլատին կա¸ և մարդիկ սկսում են գնալ ու փորփրել թույների գերեզմանոցը:
«Հայ կանայք հանուն առողջության և առողջ շրջակա միջավայրի» ոչ կառավարական կազմակերպությունն արդեն 10 տարի է՝ զբաղվում է պետական մարմիններին թունաքիմիկատների գերեզմանոցի խնդիրները ներկայացնելով¸ սակայն՝ ոչ մի արդյունք: Կարինե Դանիլելյանի խոսքով, բնապահպանության նախարարությունն էլ տեղյակ է այս ամենին, բայց նախարարության ազդեցությունը շատ փոքր է: Իսկ ինչ վերաբերում է գերեզմանոցին` դրա հետ կապված խնդիրներն անհրաժեշտ է վերջնականապես լուծել¸ համենայն դեպս՝ գոնե մինչև գարուն: Բնապահպանները զգուշացնում են¸ որ, հակառակ դեպքում, երբ գարնանը ձյունը հալչի, և անձրևներ տեղան, սողանքային գործընթացները կուժեղանան: Թե ինչ կլինի այդ ժամանակ՝ դժվար է ասել: Ի հայտ կգան նոր ճեղքեր, գերեզմանոցը կարող է մասամբ փլուզվել¸ իսկ թույնը կտարածվի քաղաքով մեկ:
