Ադրբեջանական Trend լրատվական գործակալության փոխանցմամբ`Թուրքիայի վարչապետ Ռեջեփ Էրդողանը ներկայացրել է տնտեսության զարգացումը խթանող նախագիծ, որն առնչվում է թե՛ տեղի, թե՛ օտար ներդրողներին: Այս մասին հայտարարել է Թուրքիայի էկոնոմիկայի նախարարի խորհրդական Ալփարսլան Ույմազը:
Վերջինիս խոսքերով՝ այդ նախագիծն ուղղված է Թուրքիայի թույլ զարգացած շրջանների զարգացմանը. «Ըստ այդ նախագծի՝ Թուրքիան բաժանվելու է 6 շրջանների՝ կախված դրանց զարգացման աստիճանից: Այն գործարարները, որոնք ներդրումներ կանեն Թուրքիայի թույլ զարգացած շրջաններում, կստանան հավելյալ արտոնություններ: Դա մասնավորապես վերաբերում է հարկային ոլորտին:
Ներկայիս դրությամբ Թուրքիայում շահութահարկը կազմում է 20 տոկոս: Ըստ նոր նախագծի՝ Թուրքիայի թույլ զարգացած շրջաններում ներդրումներ կատարող անձանց համար շահութահարկը նվազեցվելու է մինչև 2 տոկոսի: 5 տարվա ընթացքում նրանք կարող են ազատվել պարտադիր բժշկական ապահովագրական ու աշխատակիցների կյանքի ապահովագրական վճարներից:
Պետությունն անվճար տարածքներ է հատկացնելու ընկերությունների ստեղծման համար: Թուրքիայի թույլ զարգացած շրջաններում ներդրումներ կատարողների համար գործելու է վարկավորման հատուկ ծրագիր: Այս նախագիծը զարկ կտա Թուրքիայի արդյունաբերության մի շարք ճյուղերին, որոնք մինչ այդ այդքան էլ զարգացած չէին»:
