Երկրում ունենք մշակութային իրականության պատրանք: Այսօր «Առաջին լրատվական»-ի հետ զրույցում նման տեսակետ հայտնեց սիրված երգիչ, երգահան Վահան Արծրունին` խոսելով նոր գումարման խորհրդարանում մտավորականների ներկայացվածության անհրաժեշտության մասին:
Վահան Արծրունին նշեց, որ մենք մշակութային քաղաքականություն չունենք երկրում, մենք չունենք նույնիսկ մշակութային իրականություն: Ըստ նրա` մենք ունենք մշակութային իրականության պատրանք, այդ պատրանքը ստեղծելու համար արդեն շուրջ քսան տարի է աշխատում է մշակույթի նախարարությունը: «Դա չի նշանակում, որ մենք ունենք իրական մշակութային գործընթաց: Եթե այս իրավիճակը շարունակվի, միայն կամայացվի և կդատարկվի մշակութային դաշտը, որովհետև տենդենցները շատ վատն են»,- մեկնաբանեց անվանի երգիչը` հավելելով, որ արվեստագետները հեռանում են երկրից անդադար:
Իր խոսքում նա շատ առողջ և ճիշտ համարեց այն, որ մշակութային գործիչները, մտավորականությունը ներկայացված լինի մեր նոր գումարման խորհրդարանում: Քանի որ չի ծանոթացել կուսակցությունների նախընտրական ցուցակներին, դժվարացավ նշել, թե մտավորականությունը ներկայացվա՞ծ է ցուցակներում, թե՞ ոչ:
Վ. Արծրունու խոսքով` մշակութային քաղաքականությունը պետք չէ միայն մեկ անձով պայմանավորել, այն ավելի համակարգային խնդիր է: Անդրադառնալով երգչուհի Շուշան Պետրոսյանի քաղաքականություն մուտք գործելու պատրաստակամությանն` ասաց, որ հավատում է, որ Շուշան Պետրոսյանը շատ կցանկանար ինչ–որ բան փոխել, որովհետև ընդհանուր մշակութային դաշտի թերությունները նա ևս իր մաշկի վրա զգում է: «Գիտեմ, որ ցանկանում է լինել քաղաքականության մեջ և ոչ մի առարկում չեմ կարող ունենալ: Հասկանում եմ, որ պետք է մի կողմ դնի ստեղծագործականը, քանի որ երբ մարդ սկսում է հասարակությանը ծառայել, նա պետք է ծառայի հասարակությանը առավոտից երեկո: Իսկ դա ծանր գործ է, և եթե Շուշանը որոշել է դա անել, ես միայն ողջունում եմ»,- եզրափակեց իր խոսքը Վահան Արծրունին:
