Միայն դրական և ողջունելի փաստ է, որ Ազգային ժողովից բացի, ի դեմս ընտրությունների վերահսկողության միասնական ընտրական շտաբի, գործելու է ընտրական գործընթացների մոնիթորինգ իրականացնող ևս մեկ կառույց: «Առաջին լրատվական»-ի հետ զրույցում այս մասին ասաց ԲՀԿ-ական պատգամավոր Արամ Սաֆարյանը՝ անդրադառնալով 4 քաղաքական ուժերի՝ Հայ ազգային կոնգրեսի, Դաշնակցության, «Ժառանգության» և «Բարգավաճ Հայաստան»–ի կողմից երկու օր առաջ ստորագրված համապատասխան հայտարարությանը:
«Ինչ վերաբերում է միասնական շտաբի մասին ՀՀԿ գործադիր մարմնի անդամ Դավիթ Հարությունյանի հայտարարությանը, ապա Բաքվից երեկ վերադարձած լինելու պատճառով դրան ծանոթ չեմ: Միաժամանակ, դժվարանում եմ պատասխանել, թե ինչու Հանրապետական կուսակցությունը չմիացավ վերոնշյալ հայտարարությանը: Պատճառաբանությունները շատ կարող են լինել: Միայն կարող եմ ասել, որ մենք մեր մասնակցությունն ենք բերելու, որպեսզի ընտրական գործընթացները հաջողությամբ ավարտվեն»,- ասաց Արամ Սաֆարյանը:
Ամփոփելով՝ ԲՀԿ-ական պատգամավորը նկատեց՝ որքան մեծ լինի համագործակցող կուսակցությունների շրջանակը, այնքան մեծ կլինի հավանականությունը, որ ընտրությունները նորմալ, բարեկիրթ ու օրենքին համապատասխան կանցնեն: «Կարծում եմ՝ այստեղ ոչ հավակնությունների, ոչ էլ առաջնայնության կամ երկրորդայնության հարց է»,- նշեց Արամ Սաֆարյանը:
Հիշեցնենք, որ խորհրդարանական ընտրություններին մասնակից 4 քաղաքական ուժեր՝ Հայ ազգային կոնգրեսը, Դաշնակցությունը, «Ժառանգություն»–ը և «Բարգավաճ Հայաստան»–ը, օրերս ստորագրել են ընտրությունների վերահսկման միասնական շտաբ ստեղծելու մասին հայտարարություն, որին չի միացել միայն համատեղ քննարկմանը մասնակցած ՀՀԿ-ն:
