Ընտրությունների արդարության համար կհամագործակցենք բոլոր քաղաքական ուժերի հետ, թեկուզ նրանք «Մարտի 1»-ի գործում մեղավոր են: Այսօր «Առաջին լրատվական»-ի հետ զրույցում նման տեսակետ հայտնեց 2008 թվականի «Մարտի 1»-ի զոհ Գոռ Քլոյանի հայրը՝ ՀԱԿ անդամ Սարգիս Քլոյանը, անդրադառնալով չորս քաղաքական ուժերի միջև կնքված համաձայնությանը, ըստ որի պետք է ձևավորվի ընտրությունները վերահսկող միասնական շտաբ:
Հիշեցնենք, որ հայտարարության տակ ստորագրել է ԲՀԿ անդամ Վարդան Օսկանյանը, որը նաև մեղադրվում էր «Մարտիմեկյան» իրադարձություններում:
Ս. Քլոյանի կարծիքով` «Մարտի 1»-ի գործում Վարդան Օսկանյանը մեղավոր է, և ինքն իր կարծիքը չի փոխել: «Մարտի 1-ը մնում է Մարտի 1, մնում է չբացահայտված, այդ բոլորը ժամանակը ցույց կտա, թե ով ինչքան է մեղավոր, թեկուզ Վարդան Օսկանյանը: Առայժմ ընտրություններն են, և չենք ցանկանում այդ մասին խոսել, այս պահին կարևոր է, որ բոլորս միասին պայքարենք Հանրապետական կուսակցության դեմ: Իսկ դրանից հետո ամեն բան իր տեղը կընկնի, թե ով ինչքան է մեղավոր: Ընտրությունների արդարության համար Վարդան Օսկանյանի հետ համագործակցելը նորմալ եմ համարում, բայց գլոբալ առումով համագործակցությունը` իհարկե ոչ»,- մեկնաբանեց Սարգիս Քլոյանը` հավելելով, որ ընտրությունների արդարության համար պատրաստ են համագործակցել բոլոր քաղաքական ուժերի հետ, թեկուզ նրանք «Մարտի 1»-ի մեղավորներն են: Նա նշեց, որ ժամանակավոր այս հարցը չի բարձրացնի մինչև Հանրապետական կուսակցության ջախջախումը:
Հիշեցնենք, որ երեկ չորս քաղաքական ուժերի լիազոր ներկայացուցիչները համատեղ հայտարարություն ստորագրեցին, որով համաձայնվեցին միասնական շտաբ ձևավորել, որը պետք է հանրային վերահսկողություն իրականացնի գալիք ընտրություններին: