Քրդական Fırat լրատվական գործակալության փոխանցմամբ` Թուրքիայում իշխող «Արդարություն ու զարգացում» կուսակցության (ԱԶԿ) ռեժիմը ձերբակալված պաշտոնյաների թվով աշխարհում զբաղեցնում է առաջին տեղը: Ներկայիս դրությամբ թուրքական բանտերում գտնվում են 31 քուրդ քաղաքապետեր և 6 փոխքաղաքապետեր:
Քանի մոտենում են 2013 թվականին կայանալիք տեղական ինքնակառավարման մարմինների (ՏԻՄ) ընտրությունները, այնքան ուժեղանում են քրդական «Խաղաղություն և ժողովրդավարություն» կուսակցության (ԽԺԿ) վրա գործադրվող ճնշումները: 2009 թվականին քրդերը պատմական հաջողության հասան ՏԻՄ ընտրություններում:
Դրանից հետո սկսվեցին Թուրքիայում ահաբեկչական հռչակված ու արգելված Քրդստանի աշխատավորական կուսակցության (PKK) քաղաքացիական թև համարվող «Քրդական համայնքների միության» (KCK) գործով օպերացիաները, որոնց հետևանքով ձերբակալվեց ԽԺԿ-ի մոտ 7000 համակիր: Դրանց թվում ընդգրկված են ոչ միայն պաշտոնյաներ, այլև լրագրողներ, մտավորականներ, կին ակտիվիստներ, արհմիությունների անդամներ ու փաստաբաններ:
