Ինչպես տեղեկացրել էինք, վաղը Բարգավաճ Հայաստան կուսակցության նախագահ Գագիկ Ծառուկյանը մեկնելու է Բելառուսի նախագահ Ալեքսանդր Լուկաշենկոյի երդմնակալության արարողությանը։ Միաժամանակ Եվրամիությունը չի ճանաչում ընտրությունների արդյունքները և նույնիսկ մտադիր է Լուկաշենկոյին զրկել Եվրոպա մուտք գործելու իրավունքից։ Այսօր Գագիկ Ծառուկյանի մամուլի քարտուղար Խաչիկ Գալստյանից հարցրինք, թե ԲՀԿ նախագահի այս այցը չի՞ ազդի արդյոք Եվրոպայի հետ Հայաստանի հարաբերությունների վրա, քանի որ երկրի երկրորդ կուսակցության ղեկավարը փաստորեն դեմ է գնում ԵՄ-ի դիրքորոշմանը։ Խ.Գալստյանը պատասխանեց. «Չեմ կարծում, որ որևիցե ազդեցություն կարող է ունենալ, որովհետև Գագիկ Ծառուկյանը պետական պաշտոն չի զբաղեցնում։ Ավելին` այնտեղ է գնալու մասնավոր հրավերով։ Ինչպես գիտեք, բելառուսական կողմը տարածել էր հաղորդագրություն, որ որևիցե պետության ղեկավարի, ըստ իրենց արարողակարգի, մասնակցության նման հրավեր չի ուղարկվելու։ Իսկ Գագիկ Ծառուկյանը պետական պաշտոնյա չէ»։